Музей гісторыі Магілёва падрыхтаваў віртуальную экскурсію па горадзе эпохі Магдэбургскага права

Віртуальную экскурсію па экспазіцыі «Магілёў эпохі Магдэбургскага права» падрыхтаваў для сваіх наведвальнікаў Музей гісторыі Магілёва. Пра гэта расказалі ва ўстанове культуры.

«Старшая навуковая супрацоўніца музея Алена Марзалюк раскажа інтэрнэт-карыстальнікам аб самых цікавых этапах развіцця Магілёва са старажытных часоў да канца XIX стагоддзя. З відэа можна даведацца, калі ў горадзе з’явілася першая ратуша, якія падзеі адбываліся на яго тэрыторыі, калі ён быў часткай Вялікага Княства Літоўскага, якімі былі гараджане–у што верылі, на чым зараблялі, як апраналіся і ўпрыгожвалі сябе», – адзначылі ў музеі.

Асаблівая ўвага падчас экскурсіі нададзена перыяду найбольшага культурнага росквіту Магілёва, калі ён быў адным з самых буйных і ўплывовых ва Усходняй Еўропе, –з XVI па XVIIІ стагоддзе. Пачынаючы з 1577 года горад меў права на самакіраванне і быў прыроўнены ў правах да сталіцы дзяржавы–Вільні.

Раскажа Алена Марзалюк і аб адной з самых вядомых каштоўнасцей музея–адзінай у Беларусі копіі Статута Вялікага Княства Літоўскага 1588 года, набытай за кошт спонсарскай падтрымкі і прыватных ахвяраванняў грамадзян. Дакумент з’яўляецца найвышэйшым дасягненнем старабеларускай прававой думкі, папярэднікам еўрапейскіх канстытуцый і самага прагрэсіўнага ў Еўропе таго часу дзяржаўнага зводу законаў.

Завяршаецца відэаэкскурсія наведваннем ратушнай вежы, на самай вяршыні якой знаходзіцца ўнікальны механічны гадзіннік, зроблены магілёўскім майстрам Генадзем Галоўчыкам. Стрэлка на адным з цыферблатаў механізму праходзіць круг ўсяго адзін раз за 500 гадоў. Гадзіннікавых спраў майстар сам правядзе экскурсію і пакажа ў кадры свае вынаходніцтвы.

«Такія анлайн-падарожжы зараз вельмі актуальныя, – дадалі ў музеі. –Цяпер у нашых інтэрнэт-гасцей ёсць магчымасць не толькі бліжэй пазнаёміцца з гісторыяй Магілёва, але і аказаць падтрымку музею, праца якога, нягледзячы на ўсе цяжкасці, працягваецца». Так, на пляцоўцы MolaMola, прызначанай для хуткага збору сродкаў у інтэрнэце, створана краўдфандынг-кампанія ў падтрымку ўстановы культуры. Прапануецца падтрымаць музей і пералічыць на яго рахунак любую добраахвотную суму.

БЕЛТА