Музычная магія. Міністр культуры расказаў пра сакрэт папулярнасці «Залатога шлягера»

Сакрэтам папулярнасці міжнароднага музычнага фестывалю «Залаты шлягер» у час урачыстага адкрыцця ў Магілёве падзяліўся з журналістамі міністр культуры Руслан Чарнецкі.

«Як можна не любіць нашы старыя песні - не спяваць іх, не ўспамінаць? Асабіста я да іх стаўлюся з вельмі цёплым і пазітыўным пачуццём настальгіі, якое грэе душу, - сказаў ён. - Фестываль расказвае аб перажытых шчаслівых падзеях, якіх было нямала і якія хочацца ўспамінаць усё астатняе жыццё».

А яшчэ, упэўнены міністр, песні, якія гучаць у час «Залатога шлягера» - гэта неад'емная частка жыцця старэйшага пакалення. Яны любяць, памятаюць і з задавальненнем слухаюць іх. «Не ўяўляю, як такога фестывалю можа не быць, таму што ён 30 гадоў ідзе, і ўвесь гэты час у кожнага пакалення ёсць хіты, якія мы любілі, любім і прадаўжаем любіць, - сказаў ён. - І так будзе з кожным новым пакаленнем. Нашы маладыя людзі пасталеюць, і ў іх будуць свае песні, якія яны вось так будуць успамінаць. Таму гэта цудоўны фестываль, без якога немагчыма ўявіць культурную прастору Беларусі».

Руслан Чарнецкі назваў музычнай магіяй тое, што адбываецца на пляцоўках «Залатога шлягера», бо праходзяць дзесяцігоддзі, а песні застаюцца такімі ж папулярнымі. І ўсё таму, што любімыя матывы і словы песень вяртаюць самыя шчаслівыя імгненні жыцця. Міністр адзначыў, што ў яго вялізная колькасць любімых хітоў - ад «Старой мельницы» Ігара Нікалаева да песень групы «Рукі ўверх».

«Залаты шлягер» - унікальнае і асаблівае творчае свята. З кожным годам становіцца ўсё больш песень, якія запальваюць сэрцы слухачоў. «А гэта значыць, што і праз 30, 60, 90 і 100 – «Залаты шлягер» у Магілёве будзе жыць!» - падкрэсліў міністр культуры.

БЕЛТА