На фестывалі «Беларусь родная, музычная, народная» адбудзецца творчая прэзентацыя Чэрыкаўскага раёна

У Магілёве працягваецца фестываль народнай творчасці «Беларусь родная, музычная, народная». Стартаваўшы ў 2022 годзе, фэст працягвае сваё шэсце, прадстаўляючы культурны патэнцыял кожнага раёна Магілёўшчыны. Заўтра, 4 красавіка, на сцэне Магілёўскага абласнога цэнтра народнай творчасці і культурна-асветніцкай работы выступяць творчыя калектывы Чэрыкаўскага раёна.

У праграме творчай прэзентацыі шмат цікавага – інтрыгуе вядучы рэдактар Магілёўскага абласнога метадычнага цэнтра народнай творчасці і культурна-асветнай працы Крысціна Башарымава:

- На канцэрце будзе прадстаўлена гісторыя і сучаснасць Чэрыкаўскага раёна: ад песень да харэаграфічных пастановак. Сваю творчасць падораць вядомыя калектывы і салісты: народны ансамбль народнай песні «Родныя напевы», народны вакальны ансамбль «Езярыца», народны ансамбль «Дзяўчаты+», вакальнае трыо «Пазітыў».

У фае цэнтра будзе прадстаўлена творчасць майстроў дэкаратыўна-прыкладнога мастацтва раёна – як традыцыйнага, так і сучаснага: саломапляценне, разьба па дрэве, вышыўка. Можна не толькі наведаць майстар-класы рамеснікаў, але і набыць сувеніры.

СБ