На «Купалле» ў Александрыю з'язджаюцца першыя госці

Сёння, 5 ліпеня, аграгарадок Александрыя Шклоўскага раёна становіцца месцам прыцягнення гасцей. Тут пачынаецца фестываль «Купалле». Да самага адкрыцця свята пачынаюць з'язджацца шматлікія госці.

Яўгенія Бандарэнка з сыночкам Глебам у Александрыю прыехалі з Барысава. Эмоцыі каштуюць таго, каб пераадольваць такія адлегласці, заўважае маці:

- Выехалі ў сем раніцы, дарога была свабодная, даехалі выдатна! Перш за ўсё сын аблюбаваў пляцоўку з тэхнікай, яму вельмі падабаюцца нашы трактары і аўтамабілі. Ён заўсёды просіць мяне звазіць яго на такія тэматычныя лакацыі. У гэтым годзе былі на «Белагра», у чарзе была і Александрыя. Сёння Глеб узяў з сабой скарбонку, каб патраціць свае зберажэнні менавіта тут. У праграме сёння абавязкова наведванне майстроў, канцэртаў, прагляд авіяшоу. А самая галоўная мара сына - убачыць Прэзідэнта.

Ксенія і Вераніка Яськовы, Паліна Белавус і Вольга Урова прыехалі на «Купалле» з Гомеля. У праграме на лета фестываль у Александрыі быў нумарам адзін для наведвання. Першы пункт на фэсце дзяўчынкі ўжо выканалі - купілі купальскія вянкі:

- Убачылі рэкламу па тэлевізары, доўга не думаючы, вырашылі - едзем! Чатыры гадзіны дарогі, і мы на купальскім полі. Даўно нікуды не абіраліся. Ужо паспелі запусціць трактар, паглядзець гандлёвыя рады. На фэсце вельмі крута!

БЕЛТА