На Лядовай арэне праходзяць гульні абласнога этапа спаборніцтваў па хакеі «Залатая шайба»

У гэтыя дні Лядовая арэна Шклова прымае абласны этап спаборніцтваў па хакеі «Залатая шайба-2023». На працягу двух дзён на шклоўскім лёдзе вызначацца наймацнейшыя каманды, якія атрымаюць права прадстаўляць Магілёўскі рэгіён на рэспубліканскім этапе спаборніцтваў.

Учора на лядовай пляцоўцы скрыжавалі клюшкі гульцы з малодшай узроставай групы. На цырымоніі адкрыцця іх вітаў старшыня райвыканкама Андрэй Камко і першы сакратар абласнога камітэта 00 «БРСМ» Аляксандр Саксонаў.

Кіраўнік раёна адзначыў тую вялікую ўвагу, якая ўдзяляецца развіццю фізкультуры і спорту ў нашай краіне. Узвядзенне новых аб'ектаў, правядзенне розных турніраў, падтрымка юных спартсменаў, магчымасць навучання ў спецыялізаваных спартыўных навучальных установах і іншыя магчымасці, безумоўна, дазваляюць раскрыць талент і развіць яго да прафесійнага майстэрства. Стымулам для юных выхаванцаў аддзялення хакея Спецыялізаванай дзіцяча-юнацкай школы алімпійскага рэзерву Шклова стала перадача ім 15 камплектаў хакейнай экіпіроўкі.

У ходзе гульні вызначаны пераможцы абласнога турніру. Наймацнейшай стала каманда горада Шклова, якая ў фінальным паядынку абыграла сапернікаў з Горак з лікам 11:3, трэцяе і чацвёртае месца падзялілі зборныя Магілёва і Бабруйска.

Сёння, 16 лютага, права прадставіць Магілёўскую вобласць на рэспубліцы аспрэчаць каманды старэйшай узроставай групы (падлеткі 2008-2009 года нараджэння).

shklovinfo.by