На магілёўскім «Магатэксе» распрацавалі эфектыўную праграму па замацаванні моладзі на першым працоўным месцы

Кіраўніцтва і прафкам магілёўскага ААТ «Магатэкс» распрацавалі эфектыўную праграму па замацаванні моладзі на першым працоўным месцы. Паводле слоў генеральнага дырэктара прадпрыемства Аляксандра Пацёмкіна, на пошукі новых падыходаў да работы з моладдзю падштурхнуў недахоп спецыялістаў па асноўных прафесіях - швачак і ткачоў.

Адзін з асноўных бонусаў для пачаткоўцаў — рашэнне наймальніка аб тым, што заробак не можа быць ніжэй за 1000 рублёў. Бо пасля размеркавання маладыя людзі не маюць дадатковых выплат, якія ёсць у работнікаў са стажам.

Кадры для прадпрыемства рыхтуюць профільныя каледжы ў Магілёве, Мінску і Баранавічах. Але яны не выпускаюць аператараў шліхтавальнага і друкаванага абсталявання, апаратчыкаў рэлаксацыі і стабілізацыі пражы, набойшчыкаў і фарбавальнікаў - падрыхтоўкай і перападрыхтоўкай спецыялістаў па гэтых прафесіях «Магатэкс» займаецца сам. Ёсць вопытныя настаўнікі, а каб нагрузка не была ім у цяжар, распрацавалі палажэнне аб прэміраванні. У залежнасці ад тэрмінаў навучання высокакваліфікаваным рабочым і інструктарам даплачваюць ад 40 да 60 працэнтаў ад тарыфнай стаўкі першага разраду.

Паклапаціліся на «Магатэксе» і пра іншыя бонусы: працоўныя на перападрыхтоўцы атрымліваюць даплаты, а вытворчая практыка для навучэнцаў на прадпрыемстве аплачваная.

Спецыялістаў з вышэйшай адукацыяй матывуюць да прафесійнага росту тым, што на працягу першага працоўнага года яны праходзяць стажыроўку. Разам з дасведчанымі калегамі выбіраюць тэму, па якой малады спецыяліст рыхтуе і абараняе дыпломную работу.

Усім якія жывуць у нястачы вылучаюць пакоі ці койка-месцы ў інтэрнаце з сучасным рамонтам, новай мэбляй і халадзільнікам.

Для больш хуткай адаптацыі ў калектыве штогод у верасні праводзяцца сустрэчы моладзі з кіраўніцтвам прадпрыемства, дзе можна задаць любое пытанне наймальніку і прадстаўнікам прафактыву. Навічкоў знаёмяць з калдагаворам, расказваюць ім пра сацыяльныя гарантыі.

Сёлета ў ААТ «Магатэкс» навучылі 257 працоўных пры праходжанні вытворчай практыкі, тут працавала дзевяць студэнцкіх атрадаў з БРУ, БДУТ і Магілёўскага каледжа сферы абслугоўвання.

На прадпрыемстве ёсць спартыўная і трэнажорная залы. Маладыя супрацоўнікі ўдзельнічаюць у фізкультурна-аздараўленчых мерапрыемствах, якія рэгулярна праходзяць на «Магатэксе».

Таксама для маладых работнікаў праводзяцца экскурсіі - і забаўляльныя, і пазнавальныя, у тым ліку на іншыя прадпрыемствы аналагічнага профілю.

СБ