На падрыхтоўку школ Магілёўскай вобласці да новага навучальнага года выдаткавана каля 68 мільёнаў рублёў

На падрыхтоўку школ вобласці да новага навучальнага года выдаткавана каля Br68 млн. Капітальная рэнавацыя запланавана ў 39 установах адукацыі, у мінулым годзе такіх было 17. А касметычныя рамонты пройдуць ва ўсіх школах.

Капітальны рамонт з элементамі мадэрнізацыі - падарунак Усходаўскай сярэдняй школе ў Магілёўскім раёне да 25-гадовага юбілею. Дырэктар Святлана Трафімава называе працы «поўнай перазагрузкай»:

- Змяняем дах, усе вокны і дзверы,адмостку будынка і ліўнеўкі, супрацьдымныя дзверы ў калідорах. Галоўныя патрабаванні - бяспека і камфорт. Спартзала абнаўляецца цалкам: распранальні з душавымі, дадатковае асвятленне, антытраўматычнае гамагеннае пакрыццё на падлогу. У нашай спартзале займаюцца і бацькі вучняў, праходзяць раённыя спаборніцтвы.

Асаблівы гонар - першы ў раёне STEM-цэнтр, пад яго выдзелены цэлы паверх. Святлана Трафімава дэманструе адукацыйны праект раённага маштабу:

- Гэта сучасная лабараторыя для кабінетаў хіміі, біялогіі і фізікі з унутраным калідорам і шклянымі перагародкамі. Да нас будуць прыязджаць іншыя школы для правядзення даследчых і лабараторных работ, пры падрыхтоўцы да алімпіядаў. 1 верасня чакаем 380 вучняў, набіраем два класы першаклашак.

У адным Магілёўскім раёне капітальны рамонт закрануў пяць школ. У аддзеле адукацыі адзначаюць, што такі маштаб работ - упершыню за апошнія гады, раней абмяжоўваліся бягучымі рамонтамі. У школы раёна прыйшлі сем новых аўтобусаў, чакаюць яшчэ адзін з пад'ёмнікам для вучняў з абмежаваннямі ў фізічным развіцці.

Ва ўсіх школах Магілёва, Бабруйска і Магілёўскага раёна мяняюць старыя вокны. Кошт пытання толькі для адной школы № 39 у абласным цэнтры - каля Br750 тыс. У кабінетах ужо красуюцца новенькія шклопакеты, а ў спартзале будаўнікі яшчэ дэмантуюць вялізныя вокны. Такім чынам вырашаецца праблема энергазберажэння, тлумачыць дырэктар установы Аляксандр Салавей.

- Школа 1 верасня адзначае 35 гадоў. Старыя драўляныя рамы складана было ўцяпляць кожны сезон, у спартзале зімой было халаднавата. У найбліжэйшых планах замяніць усе аварыйныя выхады і міжкалідорныя дзверы. Да новага навучальнага года атрымалі кабінет біялогіі пад ключ - з мэбляй і абсталяваннем. Сцены дапамагаюць не толькі дома: у камфортных умовах і вучоба лепш даецца.

У сваёй мікразоне гэтая школа - культурны цэнтр: тут грунтуюцца філіял музычнай школы і тры спартыўныя секцыі. У добраўпарадкаванні актыўна ўдзельнічаюць і бацькі з дапамогай апякунскай рады, і вучні. Зараз студатрадаўцы наводзяць глянец на школьным двары: хлопцы выносяць будаўнічае смецце, дзяўчаты праполваюць клумбы. Марыя Пахомава — выпускніца школы, яна ўжо залічана студэнткай у БРУ, але вярнулася ў родную школу дапамагчы і зарабіць:

- Мне патэлефанавала завуч і прапанавала стаць камандзірам студатрада. У нас хлопцы ў лагеры працы і адпачынку зараблялі па 100 рублёў. Працуем усяго па дзве гадзіны, паспяваю і адпачыць.

 СБ