На якія мэты можна выкарыстоўваць сродкі сямейнага капіталу

З фінансавым клопатам

Дзяржава захоўвае свае сацыяльныя абавязацельствы па падтрымцы шматдзетных сем'яў. У краіне забяспечаны рост памераў дапамог па догляду дзяцей, уведзены дадатковыя віды матэрыяльнай падтрымкі сем'яў, прадастаўляецца шырокі спектр сацыяльных паслуг. Адна з самых значных мер па падтрымцы сем'яў пры нараджэнні трэціх і наступных дзяцей у Беларусі - сямейны капітал. Аднаразовае налічэнне на рахунак безнаяўных грашовых сродкаў з 1 студзеня па 31 снежня 2025 года складае 33 275 рублёў. Па стане на 1 чэрвеня 2025 года для шматдзетных сем'яў адкрыта 146512 дэпазітных рахункаў «Сямейны капітал».

СКАЗАНА

Прэзідэнт Беларусі Аляксандр Лукашэнка:

- У Беларусі дзяржава аказвае падтрымку шматдзетным па шэрагу напрамкаў, у тым ліку ў вырашэнні жыллёвага пытання. Але пры гэтым важна, каб такая дапамога была адраснай і трапляла таму, хто ў ёй насамрэч мае патрэбу. Па жыллі мы сто адсоткаў вырашым, а гэта - найважнейшая задача. Мы таксама вырашаем пытанне па сямейным капітале. Прынялі вельмі сур'ёзныя рашэнні.

У час нарады аб удасканаленні сацыяльнай падтрымкі насельніцтва, 15 кастрычніка 2024 года.

АКТУАЛЬНЫ КАМЕНТАР

Начальнік упраўлення народанасельніцтва, гендэрнай і сямейнай палітыкі Міністэрства працы і сацыяльнай абароны Святлана Белаш:

- Сродкі сямейнага капіталу вельмі дапамагаюць шматдзетным сем'ям вырашаць жыллёвыя пытанні: пры куплі або будаўніцтве жылля, пагашэнні крэдытаў або пазык, выдадзеных на гэтыя мэты. Таму больш за 70% рашэнняў па датэрміновым выкарыстанні сямейнага капіталу прымаюцца менавіта на паляпшэнне жыллёвых умоў. Павялічваецца запатрабаванасць сямейнага капіталу на аплату адукацыі. Калі ў 2020 годзе, калі толькі было дадзена права датэрміновага выкарыстання гэтых сродкаў, 6 працэнтаў рашэнняў прымаліся на аплату адукацыйных паслуг, то ў 2024-м ужо 13% шматдзетных сем'яў накіравалі сродкі сямейнага капіталу на адукацыю. Рашэннем Кіраўніка дзяржавы праграма сямейнага капіталу прадоўжана з 1 студзеня 2025 года. Адначасова былі ўведзены дадатковыя меры, якія дазваляюць сем'ям больш шырока выкарыстоўваць гэтыя сродкі.

СБ