Начальнік Магілёўскага інстытута МУС аб прыёмнай кампаніі-2024: высокая канкурэнцыя і сур'ёзны адбор

Прыёмная кампанія ў Магілёўскім інстытуце МУС заўсёды вызначаецца раннім стартам, высокай канкурэнцыяй і сур'ёзным адборам будучых курсантаў. Такой думкай падзяліўся начальнік Магілёўскага інстытута МУС Раман Раманчук.

Для таго, каб стаць курсантам міліцэйскай ВНУ, абітурыенту трэба вызначыцца са сваім жаданнем крыху раней: дні адчыненых дзвярэй, тэматычныя прафарыентацыйныя мерапрыемствы ў ВНУ закліканы дапамагчы выпускнікам зрабіць выбар. «Прыёмная кампанія ў нашай ВНУ пачынаецца раней, чым у іншых вышэйшых навучальных установах, - адзначыў Раман Раманчук. - Апошняя дата, да якой абітурыент павінен прыняць рашэнне, быць яму курсантам ці не, - гэта 15 красавіка бягучага года. Да гэтага часу выпускнік павінен падаць заяву на імя начальніка АУС па месцы жыхарства ці па месцы, дзе ён у далейшым плануе працягваць службу».

Пасля гэтага выпускнік атрымлівае накіраванне на ваенна-ўрачэбную камісію, дзе яму трэба прайсці медыцынскі агляд і прафесійны псіхафізіялагічны адбор. І калі гэтая частка завяршаецца паспяхова, наступным этапам стане здача экзаменаў.

Для паступлення ў міліцэйскую ВНУ неабходна здаць цэнтралізаванае тэсціраванне і цэнтралізаваны экзамен па рускай або беларускай мове на выбар, замежную мову і грамадазнаўства. «Многіх хвалюе пытанне, ці трэба пры паступленні здаваць нарматывы па фізічнай культуры. Не, такое выпрабаванне не прадугледжана, - падкрэсліў начальнік інстытута. - Але трэба разумець, што добрая фізічная форма патрэбная кожнаму супрацоўніку органаў унутраных спраў. У інстытуце МУС высокі ўзровень фізнагрузак, а таму я раю ўсім загадзя надаць увагу сваёй падрыхтоўцы».

Завяршальны этап уступнай кампаніі - падача дакументаў у міжвузаўскую камісію. За 5 дзён да пачатку прыёму дакументаў інфармацыя аб старце працы камісіі размяшчаецца ў інтэрнэце, сацыяльных сетках ВНУ.

За апошнія гады ўсё больш дзяўчат хочуць звязаць сваё жыццё з работай у органах унутраных спраў, а таму з кожным годам павялічваецца колькасць ахвочых паступіць у міліцэйскую ВНУ. «Звычайна набор дзяўчын абмяжоўваецца лікам ад 15 да 20 чалавек. Дзяўчатам, якія з'яўляюцца выпускніцамі ўстаноў сярэдняй адукацыі, складана канкураваць з выпускніцамі кадэцкіх вучылішчаў, нават маючы за плячыма высокія балы, напрыклад, больш за 300. Гэта звязана з тым, што дзяўчаты, якія скончылі кадэцкія вучылішчы, маюць пэўныя льготы пры паступленні, і па выніках прыёмных. кампаній да 2019 года ўсе выдзеленыя месцы па наборы дзяўчат займалі ў асноўным выпускніцы кадэцкіх вучылішчаў, - адзначыў Раман Раманчук. - Аднак вынікі прыёмных кампаній 2021-2023 гадоў даюць абгрунтаваныя надзеі выпускніцам звычайных устаноў адукацыі на паспяховае паступленне ў Магілёўскі інстытут МУС: толькі палову выдзеленых месцаў для прыёму дзяўчат занялі выпускніцы кадэцкіх вучылішчаў».