Нацыянальны банк выпусціў у абарачэнне памятную манету «Мікольская царква. Магілёў»

Нацыянальны банк выпусціў у абарачэнне памятную манету «Мікольская царква. Магілёў». Яна стала часткай серыі «Архітэктурная спадчына Беларусі», куды таксама ўвайшлі «Мірскі замак», «Замак Радзівілаў. Нясвіж», «Палац Румянцавых і Паскевічаў. Гомель», «Камянецкая вежа», «Сафійскі сабор. Полацк».

Манета наміналам у Br2 і тыражом 25 тыс. штук мае форму круга. З пярэдняга і адваротнага бакоў – кант, які выступае па акружнасці. Бакавая паверхня манеты мае надпіс Беларусь і элементы нацыянальнага арнаменту. Яе памер 23,50 мм у дыяметры. Выраблена з сталі, пакрытай меддзю і латунню (кальцо), і сталі, пакрытай меддзю і нікелем (сярэдзіна). Маса – 5,81 г. Манета з’яўляецца законным плацежным сродкам Рэспублікі Беларусь.

Свята-Мікольскі манастыр быў заснаваны ў 1636 годзе праваслаўным мітрапалітам Рэчы Паспалітай Пятром Магілай. Праз трэць стагоддзя на месцы драўляных пабудоў узвялі каменныя, у стылі барока. Галоўны храм манастыра асвячоны ў імя Святога Мікалая. У 1798 годзе побач з Мікольскім храмам была пабудавана «цёплая» (зімовая) царква, асвечаная ў імя Святога Ануфрыя Вялікага. На працягу XVII-XVIII стст. тут выраслі таксама жылыя карпусы, агароджа з брамай, званіца. Усе гэтыя пабудовы сёння ўваходзяць у манастырскі ансамбль, галоўнай дамінантай якога застаецца Мікольская царква.

Самыя раннія фрэскі ў ёй датуюцца канцом XVII стагоддзя. Акрамя таго, адноўлены разьбяны чатырох’ярусны іканастас, выкананы ў тэхніцы беларускай аб’ёмнай разьбы з пазалотай. У храме захоўваецца карціна-абраз Мікалая II-пакутніка, знойдзены ў падвале аднаго з дамоў у Магілёве ў дзень кананізацыі царскай сям’і. Сёння комплекс Свята-Мікольскага жаночага манастыра, адроджанага ў 1991 годзе, занесены ў папярэдні Спіс сусветнай спадчыны ЮНЕСКА.