Надбаўкі медработнікам з сярэдняй спецыяльнай адукацыяй будуць павялічаны ў Беларусі

Прэзідыум Саўміна прыняў рашэнне аб павелічэнні памераў надбаўкі за працу ў сферы аховы здароўя медыцынскім работнікам з сярэдняй спецыяльнай медыцынскай адукацыяй, паведамляецца са спасылкай на прэс-службу ўрада.

Міністэрствам аховы здароўя 24 студзеня 2025 года прынята пастанова нумар 9 «Аб змяненні пастановы Міністэрства аховы здароўя Рэспублікі Беларусь ад 13 чэрвеня 2019 г. №52», якая прадугледжвае павышэнне аплаты працы ўрачоў-спецыялістаў. Пры гэтым памеры заработнай платы сярэдняга медперсаналу гэтым дакументам захаваны на ранейшым узроўні.

Разгледзеўшы гэту пастанову, Прэзідыум Саўміна прыйшоў да высновы, што ў гэтым відзе прынятая пастанова не ў поўнай меры ўлічвае ўклад сярэдняга медыцынскага персаналу ў сферу аховы здароўя і не поўнасцю адпавядае даручэнню кіраўніка дзяржавы аб збалансаваным росце заработнай платы ўсіх катэгорый работнікаў.

У мэтах справядлівага ўліку інтарэсаў названай катэгорыі медыцынскіх работнікаў, а таксама забеспячэння збалансаванага росту ўзроўню аплаты працы работнікаў галіны Прэзідыум Саўміна даручыў Міністэрству аховы здароўя сумесна з Мінфінам, Мінпрацы і сацабароны ў трохдзённы тэрмін забяспечыць унясенне змяненняў у адпаведную пастанову ў частцы павелічэння ў 2025 годзе памераў надбаўкі за работу ў сферы аховы здароўя медыцынскім работнікам з сярэдняй спецыяльнай медыцынскай адукацыяй.

БЕЛТА