Народны касцюм Магілёўшчыны рэканструіруюць майстры вобласці

Сёлета тэма беларускага народнага касцюма стане адной з галоўных адметных асаблівасцей свята «Купалле» («Александрыя збірае сяброў»). Праца ў гэтым кірунку ўжо пачалася.

У межах «Александрыйскага кірмашу» кожная вобласць і горад Мінск прадставяць інтэрактыўную прэзентацыйную тэматычную экспазіцыю (беларускія падворкі, у аснове мастацкага афармлення якіх–прэзентацыя традыцыйнага рэгіянальнага адзення).

Як расказаў начальнік аддзела традыцыйнага мастацтва Магілёўскага абласнога метадычнага цэнтра народнай творчасці Аляксандр Глуздоў, зараз праходзяць папярэднія этапы абласнога конкурсу-выставы «Беларускі народны касцюм Магілёўшчыны» сярод майстроў, кіраўнікоў аматарскіх аб’яднанняў устаноў культуры і Дамоў рамёстваў, творчых калектываў. Узрост удзельнікаў не абмежаваны. Яны могуць праявіць сябе ў намінацыях: «Найлепшы традыцыйны рэканструяваны касцюм» і «Найлепшы народны стылізаваны касцюм» (этнакасцюм). Затым на фінальнай экспазіцыі прадставяць найлепшыя работы.

– Нам засталося літаральна зрабіць яшчэ некалькі штрыхоў– і народны касцюм нашага рэгіёна ўжо гатовы. Яго аднаўленнем займаліся некалькі тыдняў, праца карпатлівая, але патрэбная. Касцюм пашыты па ўсіх правілах,– запэўніла ткачыха з Хоцімска, член Саюза майстроў Таццяна Кавалёва. – Нарад кожнага рэгіёна адрозніваецца сваім арнаментам. У хоцімскіх узорах ёсць і геаметрычныя, і раслінныя элементы. А вось такі ўзор – тыпу скарабей – не сустракаецца нідзе ў Беларусі. Пра гэта нам расказалі навукоўцы з Мінска. Мы ганарымся такой разыначкай.

Народны касцюм–культурная спадчына нашай краіны. Менавіта таму ў гэтым годзе частка творчых праектаў Магілёўскага абласнога метадычнага цэнтра народнай творчасці і культурна-асветнай работы накіравана на захаванне і актуалізацыю беларускага нацыянальнага адзення.

mogilevnews.by