Навабранцы Магілёўскага інстытута МУС рыхтуюцца прынесці прысягу

У вёсцы Гаі Магілёўскага раёна, дзе размешчаны помнік батальёну Уладзімірава, пройдзе ўрачыстая цырымонія прынясення прысягі курсантамі Магілёўскага інстытута МУС.

Як паведаміў афіцыйны прадстаўнік ВНУ Кірыл Маржанаў, прысягу прыме 170 навабранцаў:

– Сярод іх 150 хлопцаў і 20 дзяўчат. Менавіта столькі хлопцаў і дзяўчат залічана ў інстытут у гэтым годзе. Яны ўжо пераадолелі трохтыднёвы навучальны збор, падчас якога прывыкалі да распарадку дня, адточвалі майстэрства страявога кроку і атрымалі сваю першую ў жыцці форму. Заўтра навабранцы вымавяць клятву вернасці Радзіме і беларускаму народу.

Новае папаўненне міліцэйскай ВНУ з нецярпеннем чакае важную падзею. Курсантка Руслана Бутоніна – у яго ліку:

– Ужо паспела прывыкнуць да формы, рэжыму. Расказваюць, што далей навучанне будзе яшчэ больш цікавым: з’явяцца новыя прадметы, практычныя заняткі. Але прысяга – гэта афіцыйны старт адукацыйнага працэсу, пачатак навучальнага года. Да таго ж, сама цырымонія вельмі прыгожая, урачыстая. Мы даём клятву вернасці сваёй краіне. Упэўнена, што абрала правільную прафесію, хачу быць карыснай сваёй дзяржаве.

Дарэчы, урачыстае мерапрыемства ўжо другім разам пройдзе ў знакавым месцы – ля помніка легендарнаму батальёну міліцыі пад камандаваннем капітана Уладзімірава. Гэта адзіны мемарыял на тэрыторыі былога Савецкага Саюза, прысвечаны памяці загінулых у гады Вялікай Айчыннай вайны супрацоўнікаў міліцыі.

СБ