Навучэнцы Магілёўскай дзяржаўнай гімназіі-каледжа мастацтваў удастоены ўзнагарод спецыяльнага фонду Прэзідэнта Беларусі па падтрымцы таленавітай моладзі

Навучэнцы Магілёўскай дзяржаўнай гімназіі-каледжа мастацтваў сталі ўладальнікамі ўзнагарод спецыяльнага фонду Прэзідэнта Рэспублікі Беларусь па падтрымцы таленавітай моладзі. Пра гэта паведаміла намеснік дырэктара па вучэбнай рабоце Наталля Алісеева.

Паводле слоў суразмоўніцы, у канцы мая сталі вядомыя імёны самых таленавітых навучэнцаў нашай краіны, якія рашэннем савета спецыяльнага фонду Прэзідэнта Рэспублікі Беларусь па падтрымцы таленавітай моладзі і распараджэннем Прэзідэнта Рэспублікі Беларусь ад 28.05.2020 № 95 атрымалі заслужаныя ўзнагароды па выніках конкурснай дзейнасці. Сярод іх навучэнцы ўстановы адукацыі «Магілёўская дзяржаўная гімназія-каледж мастацтваў імя Яўгена Глебава» Каваленка Апалінарыя і Лазарэнка Данііл.

«Гранд-прэмію з прысваеннем звання лаўрэата і ўручэннем нагруднага знака «Лаўрэат спецыяльнага фонду Прэзідэнта Рэспублікі Беларусь па падтрымцы таленавітай моладзі» атрымала Каваленка Апалінарыя, уладальніца бронзавага медаля Чатырнаццатых моладзевых дэльфійскіх гульняў дзяржаў-удзельніц СНД, – падзялілася Наталля Алісеева. – Лазарэнка Данііл, лаўрэат I ступені XVII Міжнароднага дзіцячага конкурсу «Музыка надзеі», узнагароджаны заахвочвальнай прэміяй і пасведчаннем спецыяльнага фонду».