Названы імёны пераможцаў радыёконкурсу «Маладыя таленты Беларусі»

Названы імёны пераможцаў рэспубліканскага радыёконкурсу «Маладыя таленты Беларусі – 2024». Па выніках трох конкурсных тураў узнагароджаны 140 фіналістаў. Пра гэта паведамілі ў прэс-службе Белтэлерадыёкампаніі.

Уладальнікамі гран-пры XIII рэспубліканскага творчага радыёконкурсу «Маладыя таленты Беларусі» сталі: у намінацыі «Інструментальная музыка. Ансамблі» - узорны інструментальны ансамбль «Джайв-акорд» (Жодзіна); у намінацыі «Інструментальная музыка. Народныя інструменты. Салісты» - Аляксандра Смірнова (Магілёў); у намінацыі «Інструментальная музыка. Акадэмічныя інструменты. Салісты» - Ілля Кісялёў (Маладзечна); у намінацыі «Спадчына. Ансамблі» – ансамбль народнай песні «Дзвінскія пералівы» (Наваполацк); у намінацыі «Эстрадны вакал. Салісты» - Арына Пехцерава (Магілёў).

Лаўрэатамі I, II і III ступеней вызначаны 79 салістаў і калектываў, спецыяльных дыпломаў удастоены 11 удзельнікаў. Поўны спіс імёнаў пераможцаў конкурсу размешчаны на афіцыйным сайце радыё «Культура».

Праект «Маладыя таленты Беларусі» праводзіцца з 2009 года. За ўвесь час у ім прынялі ўдзел ужо больш за 4 тыс. выканаўцаў і калектываў з усёй краіны. З 2013 года прызёры конкурсу рэгулярна становяцца стыпендыятамі спецыяльнага фонду Прэзідэнта Рэспублікі Беларусь па падтрымцы таленавітай моладзі.

Гран-пры «Маладыя таленты Беларусі» у інструментальнай музыцы — у Аляксандры Смірновай з Магілёва

БЕЛТА