Новая спецыяльнасць «харчовая бяспека» з'явіцца ў БДУТ

Новая спецыяльнасць «харчовая бяспека» з'явіцца ў Беларускім дзяржаўным універсітэце харчовых і хімічных тэхналогій. Пра гэта расказалі ў ВНУ.

Такая спецыяльнасць у Беларусі з'явіцца ўпершыню. Выпускнікі новага напрамку стануць менеджэрамі па якасці, інжынерамі па якасці, інжынерамі-тэхнолагамі, інжынерамі па стандартызацыі і сертыфікацыі, інжынерамі-хімікамі, мікрабіёлагамі, аўдытарамі, метролагамі.

«У палітыцы любой дзяржавы стратэгічна важнымі напрамкамі з'яўляюцца харчовая бяспека краіны, якая забяспечвае даступнасць дастатковай колькасці бяспечнай і пажыўнай ежы для насельніцтва краіны, а таксама неабходнасць развіцця і ўдасканалення глабальных тэндэнцый у галіне атрымання прадуктаў харчавання, - адзначыў рэктар Беларускага дзяржаўнага ўніверсітэта харчовых і хімічных тэхналогій Максім Кіркор. - Усё патрабуе новых падыходаў да кадравай палітыкі ў гэтай сферы і падрыхтоўкі высокакваліфікаваных спецыялістаў. Таму неабходнасць падрыхтоўкі спецыялістаў, якія валодаюць кампетэнцыямі ў галіне якасці харчовай сыравіны, тэхналогіямі атрымання з яе бяспечных і высокапажыўных харчовых прадуктаў, з'яўляецца актуальнай і важнай задачай».

Спецыяліст па харчовай бяспецы - гэта чалавек, які мае кампетэнцыі па харчовай бяспецы, якая ўключае ў сябе біялагічную бяспеку сыравіны і прадуктаў расліннага і жывёльнага паходжання, ацэнку рызык бяспекі харчовых прадуктаў. Таксама спецыяліст валодае ведамі ў галіне сістэмы менеджменту якасці харчовых прадуктаў, міжнароднай сістэмы харчовай бяспекі, сертыфікацыі якасці харчовых прадуктаў. Ён будзе ажыццяўляць кантроль якасці на ўсіх харчовых прадпрыемствах, укараняць інавацыйныя тэхналогіі захоўвання і перапрацоўкі сыравіны пры атрыманні харчовай прадукцыі.

«Мы будзем рыхтаваць спецыялістаў, якія ўмеюць кіраваць якасцю і бяспекай прадуктаў, праектаваць і распрацоўваць сістэмы менеджменту бяспекі харчовых прадуктаў, а таксама дасведчаных, што такое ідэнтыфікацыя і ацэнка небяспек мікробнага, хімічнага і фізічнага паходжання, фальсіфікацыі харчовых прадуктаў і многае іншае», - падкрэсліў рэктар ВНУ.

У якасці ўступных іспытаў абітурыентам неабходна будзе здаваць хімію і біялогію.

БЕЛТА