Новы аперацыйны корпус Магілёўскага анкадыспансера пачне працу ў снежні

У новым аперацыйным корпусе Магілёўскага абласнога анкадыспансера завяршылі будаўнічыя працы і пачалі мантаж і наладку медабсталявання, увод аб’екта плануецца ў снежні. Пра гэта паведаміў галоўны ўрач медустановы Антон Лысоў.

У чатырохпавярховым будынку размесцяцца 8 аперацыйных, рэанімацыйна-анэстэзіялагічнае і цэнтральнае стэрылізацыйнае аддзяленне. «Гэта значыць, мы атрымаем у адным месцы ўвесь комплекс медпаслуг, неабходных для аказання спецыялізаванай хірургічнай дапамогі хворым на рак. А праводзіць першыя аперацыі тут мы плануем ўжо ў пачатку снежня», – сказаў Антон Лысоў.

У новым корпусе будзе ўстаноўлена абсталяванне вядучых сусветных кампаній, у тым ліку беларускіх: лапараскапічнае, стэрылізацыйнае, наркозна-дыхальнае і інш., што дасць магчымасць аказваць насельніцтву кваліфікаваную, якасную і эфектыўную дапамогу. «Гэта дасць нам магчымасць, выкарыстоўваючы назапашаны вопыт, рухацца наперад, асвойваючы і аказваючы новыя віды і тыпы хірургічных умяшанняў, у тым ліку выконваць электрахірургічныя і многія новыя камбінаваныя складаныя аперацыі», – сказаў Антон Лысоў.

Дзякуючы новаму абсталяванню ў анкадыспансеры змогуць праводзіць больш аперацый, павысіць іх якасць і эфектыўнасць. Пры гэтым яны будуць менш траўматычнымі, у выніку ў хворых на ранніх стадыях захворванняў з’явіцца больш шанцаў цалкам вылечыцца.

Узвядзенне новага аперацыйнага корпуса абумоўлена часам: стары аперацыйны блок маральна і фізічна састарэў. Работы па будаўніцтве корпуса былі пачаты ў чэрвені 2016 года.

БЕЛТА