Новыя меры ўмацавання кадравага патэнцыялу прыняты ў сферы ЖКГ Магілёўскай вобласці

Новыя меры ўмацавання кадравага патэнцыялу прыняты ў сферы ЖКГ Магілёўскай вобласці. Пра гэта расказаў старшыня Магілёўскай абласной арганізацыі Беларускага прафсаюза работнікаў мясцовай прамысловасці і камунальна-бытавых прадпрыемстваў Павел Жуйкоў.

Новыя меры прадугледжаны заключаным у абласным цэнтры дадатковым пагадненнем паміж галоўным упраўленнем ЖКГ Магілёўскага аблвыканкама і абласной арганізацыяй галіновага прафсаюза. Паводле слоў начальніка галоўнага ўпраўлення ЖКГ аблвыканкама Таццяны Касаткінай, на сёння застаецца актуальным пытанне ўмацавання кадравага патэнцыялу, ад чаго непасрэдна залежыць работа прадпрыемстваў і арганізацый жыллёва-камунальнай гаспадаркі, якія выконваюць важную грамадскую і сацыяльную функцыю.

«Найважнейшай умовай якаснага аказання паслуг ЖКГ з'яўляецца фармаванне і захаванне высокакваліфікаваных кадраў у арганізацыях галіны, - падкрэсліла яна. - У дадатковым пагадненні мы прапісалі меры, накіраваныя на замацаванне работнікаў запатрабаваных прафесій, якія не дапускаюць парушэнняў вытворча-тэхналагічнай, выканальніцкай або працоўнай дысцыпліны».

У ліку такіх стымулюючых мер - выплата на падставе калектыўных дагавораў арганізацый аднаразовай грашовай узнагароды ў памеры не менш як пяць базавых велічынь маладым спецыялістам, а таксама работнікам, якія дасягнулі ўстаноўленага пенсіённага ўзросту (за кожны адпрацаваны год).

«Заключэнне дадатковай дамовы накіраванае на ўзмацненне працоўнай і сацыяльна-эканамічнай абароненасці працаўнікоў прадпрыемстваў, - падкрэсліў Павел Жуйкоў. - Увага і клопат аб чалавеку працы былі і застаюцца ў ліку прыярытэтаў дзяржаўнай палітыкі і працы грамадскіх арганізацый, і сфера жыллёва-камунальнай гаспадаркі не з'яўляецца выключэннем».

БЕЛТА