Падмога да пачатку палявога сезона: новыя трактары перадалі гаспадаркам Чавускага раёна

Ключы ад пяці новых энерганасычаных трактароў перадалі гаспадаркам Чавускага раёна.

Ва ўрачыстай абстаноўцы ключы ад трактароў уручыў першы намеснік старшыні Магілёўскага аблвыканкама Сяргей Савіцкі. Ён нацэліў аграрыяў на сур'ёзную работу, беражлівыя адносіны да тэхнікі і дасягненне ўсіх пастаўленых перад галіной задач.

«Праца механізатараў нялёгкая. Наперадзе праца ад зары да зары. Трэба набрацца цярпення, сціснуць кулакі і годна выканаць усе задачы, павялічыць паказчыкі мінулага гады. І няхай новая тэхніка ў гэтым дапаможа, - сказаў ён. - Патэнцыял у Чавускага раёна ёсць. Ёсць энтузіязм і ў кіраўніцтва раёна, прыходзяць маладыя кадры. Давайце зробім так, каб ваш раён заўсёды быў прадстаўлены толькі станоўча».

Новая тэхніка будзе размеркавана па сельскагаспадарчых прадпрыемствах раёна. «Сёння ў нас з'явілася 5 новых энерганасычаных трактароў. Гэта вялікая дапамога да пачатку сельскагаспадарчага сезона, - расказаў начальнік аддзела інтэнсіфікацыі вытворчасці сельскагаспадарчай прадукцыі ўпраўлення па сельскай гаспадарцы і харчаванні Чавускага раённага выканаўчага камітэта Аляксандр Маскалёў. - Трактары ўжо размеркавалі: 2 адзінкі адправяцца ў ААТ «Рудея Гранд», яшчэ адзін трактар паступіць у ААТ «Галавёнчыцы», адзін - у ААТ «Мірны Агра», адна адзінка накіруецца ў ААТ «Ульянаўскае Агра».

Аляксандр Маскалёў адзначыў, што ўжо не за гарамі масавы старт вясенне-палявых работ у Чавускім раёне. «Снегу ўжо амаль няма. Застаецца дачакацца, калі ўсталюецца прыдатнае надвор'е. Настрой у нас пазітыўны, тэхнікі дастаткова, механізатараў, якія адсутнічаюць, ужо па традыцыйнай схеме будзем прыцягваць з іншых арганізацый. У нас ёсць усё неабходнае, каб у поўнай меры і якасна забяспечыць цыкл вясенне-палявых работ», - сказаў ён.

Як адзначыў першы намеснік старшыні - начальнік упраўлення па сельскай гаспадарцы і харчаванні райвыканкама Аляксей Беразюк, новыя трактары - не апошняя новая тэхніка, якая прыбудзе ў раён. «У гэтым годзе абновяцца плугі, з'явяцца новыя культыватары, яшчэ адзін універсальны агрэгат «Раса» і іншая тэхніка. Усё гэта набываецца для раёна з дапамогай Магілёўскага аблвыканкаму. І гэта значная і важная падтрымка для аграрыяў, якая дапаможа забяспечыць правядзенне вясенне-палявых работ ва ўстаноўленыя агратэхнічныя тэрміны, праводзіць работы на больш высокім узроўні, - упэўнены Аляксей Беразюк. - Настрой на гэты сельскагаспадарчы год у нас баявы. Прыгравае сонца, устанаўліваецца вясновае надвор'е. А гэта значыць, што мы ў любы момант павінныя быць гатовыя да выхаду ў палі».

БЕЛТА