RU BY EN 中文
Twitter Instagram

Паказальныя выступленні пілотаў і парашутыстаў чакаюць гасцей свята ў Александрыі

Пілоты і парашутысты Магілёўскага аэраклуба рыхтуюцца да паказальных выступленняў на фестывалі «Александрыя збірае сяброў». Дэманстрацыйныя палёты – адна з самых відовішчных падзей купальскага свята. Паказаць найвышэйшы пілатаж у небе над Александрыяй –задача для сапраўдных прафесіяналаў.

За штурвал аднаго з самалётаў сядзе намеснік начальніка Магілёўскага аэраклуба па лётнай падрыхтоўцы Віталь Шамардзін. Ён расказаў, што падчас дэманстрацыйных палётаў усё павінна быць не толькі эфектна, але і –у першую чаргу –бяспечна для гледачоў. Як правіла, у папярэднія гады лёталі на самалётах Як-52, у гэтым годзе лётчыкі задзейнічаюць адзін Як-52 і два Як-55. Як адзначыў Віталь Шамардзін, у адзінкавым экзэмпляры такі самалёт ужо ўдзельнічаў у паказальных выступленнях у Александрыі. Сёлета задзейнічаюць два Як-55, каб паказаць сустрэчны пілатаж.

Сваю праграму рыхтуюць і парашутысты. Так, беларускі сцяг зноў упрыгожыць неба над Александрыяй! Як адзначыла інструктар-метадыст клуба Галіна Раковіч, кожны год пілоты і парашутысты аэраклуба рыхтуюць новую праграму для гледачоў, нязменным застаецца толькі адно:у небе над Александрыяй зноў разгорнецца беларускі флаг.

Свята «Александрыя збірае сяброў» ужо на гэтых выхадных –11–12 ліпеня –пройдзе ў Шклоўскім раёне. Дэманстрацыйныя палёты Магілёўскага аэраклуба пройдуць вечарам першага фестывальнага дня.

«Радыё Магілёў»
 

 

Пры выкарыстанні матэрыялаў актыўная гіперспасылка на mogilev-region.gov.by абавязковая