Памятны знак, прысвечаны адзінству беларускага народа, плануюць усталяваць у Магілёве

Памятны знак, прысвечаны адзінству беларускага народа, плануюць усталяваць у Магілёве. Пра гэта паведамілі на планёрцы гарвыканкама.

Над стварэннем знака працуе магілёўскі скульптар Аляксандр Мінькоў. Паводле яго слоў, скульптурная кампазіцыя будзе ўяўляць сабой кветку васілёк, яе верхнюю частку абгінае ручнік з арнаментам, які сімвалізуе сувязь часоў, пакаленняў і яднанне народа. Паводле задумы аўтара, эстэтычным і сэнсавым дадаткам да памятнага знака стануць каласкі з зернем, якія ў дадзеным кантэксце будуць знакамі ўрадлівасці, дабрабыту, багацця і стануць сімваламі самога народа.

Вышыня скульптурнай кампазіцыі складзе 2 м 80 см, шырыня – 1 м 20 см. Вырабяць яго з уральскага граніту.

Усталяваць помнік плануюць на пляцоўцы каля дыягнастычнага цэнтра, якую маюць намер у найбліжэйшы час назваць плошчай Народнага адзінства.

Рэалізаваць праект збіраюцца да першага святкавання ў горадзе Дня народнага адзінства, гэта значыць да 17 верасня.

Скульптар Аляксандр Мінькоў больш за 15 гадоў працуе з каменем, удзельнічае ў скульптурных пленэрах. Яго працы ёсць у Магілёве, у тым ліку ў парку Падміколля, і ў Клічаве. Ён з’яўляецца аўтарам скульптуры «З’яўленне іконы», усталяванай у Бялынічах з нагоды святкавання ў 2020 годзе Дня пісьменства.

mogilevnews.by