Пажары, палы травы, ДТЗ і выратаваны з вады пенсіянер: статыстыка мінулых выхадных

Шэсць пажараў адбылося за выхадныя ў вобласці, 29 разоў ратавальнікі выязджалі на тушэнне сухой расліннасці. Падчас аператыўнай працы выратавана 2 жылыя дамы, 2 гаспадарчыя будынкі і 2 адзінкі тэхнікі. Пра гэта паведаміла старшы інспектар абласнога ўпраўлення МНС Вольга Нехарошых.

За выхадныя ў Бабруйску пад вогненную хвалю трапілі 2 аўтамабілі. У суботу, 9 красавіка, каля гадзіны дня на вуліцы Кастрычніцкай загарэўся аўтамабіль BMW X5, 2002 года выпуску. У выніку пажару пашкоджана панэльная частка аўтамабіля. Прычына ўзгарання высвятляецца.

У нядзелю, 10 красавіка, ад відавочцаў паступіла паведамленне аб пажары аўтамабіля Hyundai Santa Fe, 2001 года выпуску, які знаходзіцца ў лясным масіве каля вёскі Ламы Бабруйскага раёна. У выніку здарэння знішчаны бампер, пашкоджаны маторны адсек, капот, пярэднія крылы, лабавое шкло і пярэдняя панэль аўтамабіля. Прычыну таго, што адбылося, яшчэ трэба будзе высветліць спецыялістам.

У гэты ж дзень, меркавана з-за парушэння правілаў эксплуатацыі электрасетак і электраабсталявання, загарэўся прыватны жылы дом па вуліцы Гагарына ў Магілёве. Ратавальнікаў выклікалі суседзі – з-пад даху дома ішоў дым. Падраздзяленні МНС не далі агню знішчыць жыллё.

Суботнім вечарам выратавальнікам паступіла паведамленне аб дарожна-транспартным здарэнні з наяўнасцю пацярпелага на аўтадарозе Орша–Шклоў каля вёскі Слабодка Шклоўскага раёна. 

Аўтамабіль Форд Мандэа заехаў у прыпынак грамадскага транспарту. На шчасце, у момант аварыі людзей на прыпынку не было. У выніку ДТЗ кіроўца аўтамабіля апынуўся заблакаваным. Са сталёвай пасткі маладога чалавека дэблакавалі работнікі Шклоўскага РАНС. Выратаваны з траўмамі рознай ступені цяжару шпіталізаваны, аўтамабіль атрымаў механічныя пашкоджанні.

Яшчэ адзін няшчасны выпадак адбыўся ў мінулыя выхадныя на заліве Дняпра па вул. Гагарына  ў Магілёве.

Суботнім днём рыбачыў 60-гадовы ахоўнік Кастрычніцкага аддзела Дэпартамента аховы МУС РБ Міхаіл Цішкевіч і убачыў у вадзе ў несвядомым стане чалавека на адлегласці каля 2 м ад берага. З дапамогай палкі рыбак падцягнуў пацярпелага, выцягнуў яго на бераг і выклікаў ратавальнікаў, якія сумесна з медыкамі на месцы аказалі выратанаваму пенсіянеру медыцынскую дапамогу. Мужчына ў цяжкім стане быў шпіталізаваны.

Рэд.