Пераможцам абласнога конкурсу «Прыпеўкі бяспекі» стаў хор ветэранаў імя Г. П. Обуха з Магілёва

Прыпеўкі – самы любімы і цытуемы від народнай творчасці. У чатырохрадкоўе з лішкам месціцца ўся соль зададзенай тэматыкі, а яна разнастайная: рэаліі жыцця, узаемаадносіны, пачуцці і г. д. Ратавальнікі ўнеслі сваю пярчынку ў тэматыку прыпевак.

У Магілёўскай вобласці прайшоў конкурс для пенсіянераў «Прыпеўкі бяспекі». Больш за 100 работ было прадстаўлена на суд журы. Пазітыў, крэатыў і самабытнасць, дапоўненыя харэаграфічнымі навыкамі –журы было нялёгка, –расказала старшы інспектар абласнога ўпраўлення МНС Вольга Нехарошых.

І ўсё ж метадам гарачых спрэчак і аргументаваных дэбатаў былі вызначаны пераможцы. Бронза аказалася ў руках Надзеі Мендзелевай з Крычава, якой таленавіта акампанаваў Леанід Іваноў. Другое месца ў Марыны Макаранка са Слаўгарада. Пераможцам аднадушна прызналі хор ветэранаў імя Г. П. Обуха з Магілёва. Прыз глядацкіх сімпатый заваявала магіляўчанка Валянціна Шлеміна.

Рэд.