Перспектывы развіцця кансервавай галіны абмеркавалі на рэспубліканскім семінары ў Быхаве

Рэспубліканскі навукова-практычны семінар «Стратэгія развіцця галіны: вынікі і перспектывы» сабраў у Быхаве прадстаўнікоў кансервавай галіны краіны.

Як расказаў генеральны дырэктар РУП «НПЦ НАН Беларусі па харчаванні» Аляксей Меляшчэня, такія семінары праводзяцца ўжо каля 20 гадоў сумесна з канцэрнам «Белдзяржхарчпрам». І гэта не проста традыцыя, а магчымасць абмеркаваць найбольш важныя тэмы, праблемныя моманты і знайсці для іх шляхі вырашэння. А зараз такія сустрэчы маюць асаблівае значэнне, бо ў краіне ідзе пяцігодка якасці.

«Такая сістэмная работа з прадпрыемствамі, якія ўваходзяць у склад канцэрна і якія не ўваходзяць у склад, вядзецца ўвесь час. Мы прэзентуем для калег і прадпрыемстваў свае навуковыя распрацоўкі, узнімаюцца тыя праблемы, якія патрабуюць вырашэння ў галіне вытворчай сыравіны, якасных характарыстык самай сыравіны, самой прадукцыі, якія ўзнікаюць праблемы на рынках, - адзначыў ён. - Кожны раз фармат крыху мяняецца, абмяркоўваюцца найбольш значныя праблемы. Тут выпрацоўваюцца калі не нейкія канкрэтныя рашэнні, то, прынамсі, ставяцца задачы перад навукай, перад нашым цэнтрам па харчаванні, канцэрнам «Белдзяржхарчпрам». У нас звычайна прысутнічаюць прадстаўнікі Дзяржстандарта, МАРТ. Гэта значыць абмеркаванне пытанняў вядзецца комплексна».

Ёсць некалькі аспектаў развіцця кансервавай галіны, якія заўсёды знаходзяцца пад пільнай увагай. Напрыклад, мадэрнізацыя. І тут, упэўнены Аляксей Меляшчэня, нельга спыняцца. Умовы надвор'я таксама ўносяць свае карэкціроўкі ў работу ўсёй галіны. Бо ад ураджаю гародніны залежыць якасць і аб'ёмы прадукцыі. Але і тут прадпрыемствы шукаюць шляхі вырашэння: свой рынак пладова-агародніннай прадукцыі ў Беларусі вялікі, а калі з'яўляецца неабходнасць дакупіць сыравіну - наладжаны імпарт.

У час навукова-практычнага семінара ўдзельнікі не толькі абмяркоўваюць найбольш важныя аспекты развіцця галіны, але і наведваюць розныя прадпрыемствы. Сёння яны пазнаёміліся з поўным цыклам вытворчасці сезоннай прадукцыі ў ТАА «Быхаўскі кансервавы завод». Як падкрэсліў Аляксей Меляшчэня, у такіх візітах ёсць свае плюсы. Акрамя гэтага, падчас семінара праходзіць узнагароджанне пераможцаў конкурсу кансерваванай прадукцыі «Хрустальны яблык».

Цеснае ўзаемадзеянне навукі і прадпрыемстваў кансервавай галіны дае свой плён. «Мы ўвесь час працуем з усімі прадпрыемствамі на ўсіх этапах. Гэта і да моманту пачатку вытворчасці, паколькі большасць вытворчасцей сезонныя ў кансервальнікаў, так і ў працэсе ўзнікаюць нейкія вытворчыя пытанні: асваенне новай прадукцыі, спалучальнасць сыравіны, праверка якасных паказчыкаў. У гэтым плане мы працуем вельмі цесна практычна з усімі прадпрыемствамі хоць дзяржаўнай, хоць прыватнай формы ўласнасці», - падсумаваў ён.

БЕЛТА