Праект «Студэнцкая Ліга маладых аналітыкаў» стартаваў у Магілёве

Праект «Студэнцкая Ліга маладых аналітыкаў» стартаваў у Магілёве. Першае арганізацыйнае яго пасяджэнне прайшло ў першы дзень лета ў Магілёўскай абласной навукова-тэхнічнай бібліятэцы.

Удзельнікамі сустрэчы сталі памочнік Прэзідэнта – інспектар па Магілёўскай вобласці Леанід Мартынюк, начальнік аддзялення па Магілёўскай вобласці Беларускага інстытута стратэгічных даследаванняў Алег Корапаў, начальнік галоўнага ўпраўлення ідэалагічнай работы і па справах моладзі Магілёўскага аблвыканкама Кацярына Музычэнка, намеснік начальніка галоўнага ўпраўлення ідэалагічнай работы і па справах моладзі Магілёўскага аблвыканкама Алег Пішчанка і намеснік начальнік аддзела ідэалагічнай работы і па справах моладзі Магілёўскага гарвыканкама Ірына Сталярова, а таксама найлепшыя студэнты магілёўскіх ВНУ, вядучыя аналітыкі рэгіёна.

Як адзначыў Алег Корапаў, з’яўленне ў Магілёве такога праекта як «Студэнцкая Ліга маладых аналітыкаў» абумоўлена патрабаваннем часу. «Сёння мы бачым, што звыклая для ўсіх фраза «хто валодае інфармацыяй, той валодае светам» трансфармавалася ў новую форму – «хто кіруе інфармацыяй, той кіруе сусветнымі працэсамі», – сказаў Алег Корапаў. – І гэта сапраўды так. Зараз ідуць працэсы апрацоўкі свядомасці людзей: на гэта працуюць цэлыя інстытуты, ствараюцца цэлыя фэйкавыя фабрыкі. І нам вельмі важна дапамагчы моладзі разабрацца ў гэтым бурным патоку навін, фактаў і тэндэнцый, навучыць яе думаць, а галоўнае аналізаваць тое, што адбываецца вакол.

Таму не выпадкова, што асноўная мэта праекта – пошук таленавітай моладзі, схільнай да аналітычнай дзейнасці, і ў гэтым плане супрацоўніцтва з вышэйшымі навучальнымі ўстановамі вельмі важнае для нас. Любая аналітыка – гэта, перш за ўсё, дакладнасць, аб’ектыўнасць, актуальнасць і паўната. І мы разам са студэнтамі будзем крок за крокам рухацца ў бок пазнання аналітычных працэсаў».

На даны момант у праекце прымае ўдзел 15 студэнтаў магілёўскіх ВНУ. Гэта маладыя людзі, якія ўжо паспелі праявіць сябе ў грамадскай і навуковай дзейнасці і якім цікавая аналітычная праца.

У межах першага пасяджэння адбылося знаёмства з удзельнікамі праекта, з дзейнасцю Беларускага інстытута стратэгічных даследаванняў. Маладыя людзі прынялі ўдзел у эксперыментальным сацапытванні і разам з аналітыкамі прааналізавалі атрыманыя вынікі, а таксама азнаёміліся з асаблівасцямі арганізацыі працы з моладдзю ў вобласці, намецілі планы на будучыню.

Як адзначыў Алег Корапаў, такія сустрэчы ў рэгіёне будуць праходзіць на пастаяннай аснове і ў фармаце дыялогавых і дыскусійных пляцовак. «Нам важна гаварыць адзін з адным, слухаць і чуць і тым самым дапамагаць адзін аднаму ў фарміраванні думкі па розных пытаннях», – сказаў начальнік рэгіянальнага аддзялення БІСД.

mogilevnews.by