Прафілактычная акцыя ДАІ «Маленькі пасажыр – вялікая адказнасць!» праходзіць у Магілёўскай вобласці

Рэспубліканская акцыя «Маленькі пасажыр – вялікая адказнасць!» праходзіць у Магілёўскай вобласці. Прафілактычныя мерапрыемствы, накіраваныя на павышэнне ўзроўню дарожна-транспартнай бяспекі юных пасажыраў, працягнуцца да 24 жніўня, паведамілі ў аддзяленні па агітацыі і прапагандзе ДАІ УУС Магілёўскага аблвыканкама.

Паводле слоў суразмоўцаў, перыяд заканчэння школьных канікул і пачатку новага навучальнага года характарызуецца павелічэннем колькасці ДТЗ з удзелам непаўналетніх. Гэта абумоўлена масавай перавозкай дзяцей з месцаў адпачынку і аздараўлення. Акрамя таго, за лета школьнікі страчваюць навыкі бяспечных паводзін на дарозе ва ўмовах высокай інтэнсіўнасці руху аўтатранспарту.

«Сёння, калі ў большасці сем’яў ёсць аўтамабілі і бацькі штодня здзяйсняюць паездкі з дзецьмі, востра стаіць праблема абароны дзіцяці ў выпадку ДТЗ. Яго лёс у аварыйнай сітуацыі вызначае тое, як ён сядзіць у аўтамабілі, – адзначылі суразмоўцы. – І хоць, згодна з ПДР, у таксі дапускаецца перавозіць дзяцей ва ўзросце да 12 гадоў без выкарыстання аўтакрэсла, паклапаціцца пра бяспеку дзіцяці пры перавозцы ў любым транспартным сродку – галоўны абавязак дарослых і, у прыватнасці, бацькоў! Таму, выклікаючы таксі, удакладніце аператару, што збіраецеся ехаць з маленькім дзіцём, якому неабходна дзіцячая ўтрымлівальная прылада».

Спецыялісты нагадалі, што перавозка дзяцей ва ўзросце да 5 гадоў у легкавым аўтамабілі павінна ажыццяўляцца з абавязковым выкарыстаннем утрымлівальных прылад, якія адпавядаюць вазе і росту дзіцяці.

Дзяцей ад 5 да 12 гадоў неабходна перавозіць з выкарыстаннем утрымлівальных прылад ці іншых сродкаў (бустараў, спецыяльных падушак для сядзення, дадатковых сядзенняў), якія дазваляюць бяспечна прышпіліць дзіця з дапамогай рамянёў бяспекі, прадугледжаных канструкцыяй транспартнага сродку. «Пры гэтым важна правільна зафіксаваць юнага пасажыра: Дыяганальны рэмень павінен праходзіць праз плячо і грудную клетку і не саслізгваць на шыю», – падкрэслілі ў ДАІ.

Перавозіць дзяцей на каленях нельга. Калі падчас сутыкнення дарослы не прышпілены, то сіла ўдару адкідвае яго наперад, і ён сваёй масай можа прыціснуць малога. Калі папярэдне прышпіліцца, то ў выпадку аварыі дзіцяці (нават калі гэта немаўля) проста немагчыма будзе ўтрымаць.

Недапушчальна прыфастрыгоўваць адным рамянём і пасажыра і дзіця, якое сядзіць у яго на каленях. Беспярэчнае правіла – адзін рэмень для аднаго чалавека.

«Пакідаць дзяцей у аўтамабілі наогул непрышпіленымі таксама нельга, – заўважылі спецыялісты. – Тым больш дазваляць ім уставаць на ногі, перамяшчацца па салоне, станавіцца на калені на заднім або на пярэднім пасажырскіх сядзеннях: пры экстраным тармажэнні або сутыкненні дзіця можа атрымаць траўму ці нават загінуць. Толькі спецыяльная дзіцячая ўтрымлівальная прылада з’яўляецца дзейсным сродкам бяспекі для маленькіх пасажыраў».

Правілы перавозкі дзяцей у аўтамабілі (аўтобусе пры перавозцы груп дзяцей) абавязваюць кіроўцаў няўхільна выконваць правілы дарожнага руху: выбіраць аптымальны хуткасны рэжым і не здзяйсняць рызыкоўных манеўраў. Такі падыход у выпадку аварыі можа выратаваць жыццё і здароўе пасажыраў. За парушэнне правілаў перавозкі дзяцей для вадзіцеля прадугледжаны штраф у памеры да 4 БВ.

«Ваш маленькі пасажыр – самы галоўны. Яго паездка ў аўтамабілі павінна быць максімальна камфортнай і, вядома ж, бяспечнай. Бо ніякае грашовае пакаранне несувымернае з жыццём дзіцяці», – падкрэслілі ў аддзяленні па агітацыі і прапагандзе ДАІ УУС Магілёўскага аблвыканкама.

З пачатку года на тэрыторыі рэгіёна з удзелам непаўналетніх адбылося 26 ДТЗ, у якіх 1 падлетак загінуў і 25 атрымала траўмы.