Простыя мары - запаветныя жаданні: у Магілёўскай вобласці стартавала акцыя «Цуды на Каляды»

У Магілёве далі старт абласному этапу рэспубліканскай акцыі «Цуды на Каляды», сімвалам якой па традыцыі застаюцца маленькія чырвоныя рукавічкі.

Галоўная асаблівасць акцыі - сапраўдная ёлка жаданняў, якая размясцілася ў ЦУМе. Замест упрыгожванняў на ёй - паштоўкі з такімі простымі, але запаветнымі жаданнямі маленькіх жыхароў рэгіёна. Кожны жадаючы зможа стаць сапраўдным чараўніком і здзейсніць чыюсьці запаветную мару. Для гэтага пад ёлкай ёсць спецыяльная каробка «Добрых сэрцаў», куды можна пакласці навагодні падарунак і пакінуць добрае пажаданне дзецям.

Сёлета на ёлцы размясціліся запаветныя мары падапечных Крычаўскага раённага цэнтра карэкцыйнага развіваючага навучання і рэабілітацыі і Горацкага раённага цэнтра карэкцыйна-развіваючага навучання і рэабілітацыі. Дзякуючы акцыі сумеснай акцыі БРСМ і БРПА моладзь рэгіёну зможа выканаць жаданні больш як 60 дзяцей. Атрымаюць падарункі і дзеці са шматдзетных і малазабяспечаных сем'яў.

Тут размясціліся карткі з дзіцячымі жаданнямі. Хлапчукі і дзяўчынкі рознага ўзросту мараць пра канструктары, настольныя і развівальныя гульні, наборы для творчасці, паравозы і чыгункі, просяць у Дзеда Мароза мячы, заплечнікі, мяккія цацкі, кніжкі і наборы дзіцячай касметыкі.

Нязменнымі ўдзельнікамі акцыі сталі валанцёры руху «Добрае сэрца». Яны будуць расказваць наведвальнікам пра акцыю і прапаноўваць паўдзельнічаць у такой важнай справе.

Сярод пастаянных валанцёраў на такіх акцыях - студэнтка факультэта эканомікі і права Магілёўскага дзяржаўнага ўніверсітэта ім. А.А.Куляшова Ніна Пятроўская. Дзяўчына расказала, што брала ўдзел у такіх дабрачынных акцыях яшчэ са школы. «На сваім факультэце я з'яўляюся каардынатарам валанцёрскага руху. Мы часта праводзім падобныя акцыі ў ВНУ, - падзялілася яна. - І кожны год я не застаюся ўбаку. Бо ў нас ёсць дзеці, якія з-за пэўных прычын або стану здароўя крыху больш за іншых маюць патрэбу ў свяце і цудах. Мы расказваем людзям пра акцыю, прапануем стаць удзельнікамі і выканаць маленькае дзіцячае жаданне. І прыемна, што людзі адгукаюцца і таксама не застаюцца ў баку. Агульнымі сіламі мы ствараем для дзяцей сапраўднае свята і ўмацоўваем іх веру ў тое, што цудам у жыцці заўсёды ёсць месца».

Яшчэ адна ўдзельніца акцыі - студэнтка эканамічнага факультэта Беларускага дзяржаўнага ўніверсітэта харчовых і хімічных тэхналогій Карына Пупенкова. «Для мяне Новы год - гэта сямейнае і цёплае свята. І хочацца, каб ён быў такім жа для іншых людзей, - разважае яна. - Хочацца, каб дзеці, у якіх у жыцці не ўсё так проста, таксама захавалі веру ў чараўніцтва і дабро. І такімі акцыямі, сваім удзелам і падарункамі мы таксама ствараем для маленькіх жыхароў вобласці сапраўдную казку. Шчаслівая дзіцячая ўсмешка - найлепшая ўзнагарода для нас».

Яркая інтэрактыўная праграма, разнастайныя актыўнасці і роставыя лялькі - усё гэта дапамагло сёння стварыць сапраўднае свята. І нездарма - першыя падарункі ўжо апусціліся ў тэматычную каробку.

Выканаць дзіцячае жаданне зможа любы. Акцыя будзе праходзіць да 29 снежня з 16.00 да 19.00 акрамя выхадных і святочных дзён.