Прыняты рэзалюцыя і зварот удзельнікаў VI Усебеларускага народнага сходу

Прыняты рэзалюцыя і зварот удзельнікаў VI Усебеларускага народнага сходу.

Як адзначыў старшыня рэдакцыйнай камісіі Валерый Міцкевіч, правядзенню форуму папярэднічала вялікая грамадская дыскусія, арганізаваная ў розных фарматах. Было створана 1,2 тыс. дыялогавых пляцовак, у якіх прынялі ўдзел прадстаўнікі грамадскіх арганізацый і палітычных партый, бізнес-супольнасцяў, студэнцкай і працоўнай моладзі. Ва ўсіх рэгіёнах краіны працавалі грамадскія прыёмныя.

«На афіцыйны сайт Усебеларускага народнага сходу свае ініцыятывы і прапановы накіравала больш за 1,4 тыс. чалавек. Усяго ў ходзе агульнанацыянальнай грамадскай дыскусіі ў арганізацыйны камітэт сходу паступіла звыш 17 тыс. прапаноў, якія тычацца перспектыў развіцця краіны. Абмеркаванне датычылася самага шырокага кола тэм: эканоміка, сацыяльная сфера, моладзевая палітыка, грамадскае развіццё, дзяржаўнае будаўніцтва. Большая частка прапаноў сацыяльна-эканамічнага характару была ўключана ў асноўныя палажэнні праекта Праграмы сацыяльна-эканамічнага развіцця Беларусі на 2021–2025 гады», – адзначыў Валерый Міцкевіч.

Асноўныя напрамкі сацыяльна-эканамічнага і грамадска-палітычнага развіцця краіны абмяркоўваліся на працягу двух дзён. Адбыліся выступленні дэлегатаў і запрошаных. «Выступілі прадстаўнікі прамысловасці і сельскай гаспадаркі, бізнесу і грамадскіх арганізацый, моладзі, духавенства, дзяржслужачыя, эксперты. Думаю, са мной пагодзяцца ўсе: абмеркаванне было шчырым і зацікаўленым, выказваліся самыя розныя меркаванні і прапановы. Але ўсе іх аб’ядноўвае адно – адказная грамадзянская пазіцыя і імкненне зрабіць усё магчымае для развіцця і росквіту нашай Радзімы, моцнай і незалежнай Беларусі, – адзначыў старшыня рэдакцыйнай камісіі. – За час працы паступіла больш за 140 лістоў і прапаноў як з боку дэлегатаў сходу, так і ад простых грамадзян. На мой погляд, гэта бачнае сведчанне непадробнай цікавасці людзей, разумення лёсавызначальнасці і той знакавай ролі, якую закліканы сыграць наш форум у гісторыі сучаснай Беларусі».

Усе гэтыя прапановы былі вывучаны, абагульнены і сістэматызаваны. «З улікам асноўных палажэнняў даклада Прэзідэнта, выступленняў удзельнікаў сходу, прапаноў, рэдакцыйная камісія дапрацавала праект рэзалюцыі VI УНС», – дадаў Валерый Міцкевіч. Ён таксама зачытаў тэкст рэзалюцыі перад дэлегатамі і ўдзельнікамі форуму. Затым адбылося галасаванне.

«Аналіз вынікаў папярэдняй пяцігодкі сведчыць, што, нягледзячы на знешнія выклікі і абмежаванні, рашэнні пятага Усебеларускага народнага сходу ў асноўным выкананы. Удалося забяспечыць рост узроўню жыцця насельніцтва, захаваць бяспеку і суверэнітэт краіны. ВУП на душу насельніцтва па парытэце пакупніцкай здольнасці ўзрос за пяцігоддзе на 14 % і дасягнуў у 2020 годзе $20,2 тыс. У краіне забяспечана стабільная занятасць насельніцтва, рэальная заработная плата вырасла больш чым у 1,3 раза. Захаваны кантроль за ростам цэн», – адзначаецца ў рэзалюцыі.

Чаканая працягласць жыцця дасягнула 74,5 года, што сведчыць у ліку іншага пра высокі ўзровень беларускай медыцыны. Краіна займае    25-ю пазіцыю ў рэйтынгу спрыяльных для мацярынства краін. Кожнаму прадастаўлена магчымасць атрымаць якасную адукацыю. Па індэксе адукацыі рэспубліка ўваходзіць у топ-30 перадавых дзяржаў свету.

Знізілася адміністрацыйная і кантрольная нагрузка на бізнес. У рэйтынгу Сусветнага банка Doing Business («Вядзенне бізнесу – 2020») Беларусь заняла 49-ю пазіцыю сярод 190 эканомік свету. Разам з тым застаецца нявырашаным шэраг пытанняў. Неабходны больш інтэнсіўны рост ВУП, экспарту і інвестыцый.

Не зжыты бюракратызм у прыняцці кіраўніцкіх рашэнняў. Не завершана стварэнне паўнавартаснага электроннага ўрада. Патрабуюцца новыя стымулы для росту колькасці насельніцтва.

«Шосты Усебеларускі народны сход пастанаўляе: ухваліць асноўныя палажэнні Праграмы сацыяльна-эканамічнага развіцця Рэспублікі Беларусь на 2021–2025 гады і падтрымаць яе галоўную мэту – забеспячэнне стабільнасці ў грамадстве і росту дабрабыту грамадзян за кошт мадэрнізацыі эканомікі, нарошчвання сацыяльнага капіталу, стварэння камфортных умоў для жыцця, працы і самарэалізацыі чалавека. Сацыяльная дзяржава застанецца нязменным нацыянальным брэндам Беларусі», – гаворыцца ў дакуменце.

Вызначыць наступныя прыярытэты наступнага пяцігоддзя: шчаслівая сям’я – умацаванне традыцыйных сямейных каштоўнасцяў, заснаваных на фізічным і духоўным дабрабыце, выхаванні дзяцей і моладзі, клопаце аб старэйшым пакаленні; моцныя рэгіёны – камфортныя і бяспечныя ўмовы жыцця і працы, развітая сацыяльная інфраструктура, высокая мабільнасць, інвестыцыі ў новыя эфектыўныя вытворчасці; інтэлектуальнае асяроддзе – якасная і даступная адукацыя, раскрыццё асобаснага патэнцыялу, развіццё навукі. Стварэнне адукацыйнай сістэмы новага тыпу, нацэленай на выхаванне грамадзяніна, фарміраванне навыкаў і кампетэнцый, якія ў поўнай меры адпавядаюць патрэбам эканомікі; дзяржава-партнёр – умацаванне дыялогу і ўзаемнага даверу паміж дзяржавай і грамадствам, дзяржавай і чалавекам, дзяржавай і бізнесам.

Рэалізацыя прыярытэтаў будзе ажыццяўляцца па наступных асноўных напрамках: паляпшэнне якасці жыцця праз узмацненне сямейнай палітыкі і ўмацаванне здароўя нацыі; паскоранае і збалансаванае рэгіянальнае развіццё праз стварэнне новых вытворчасцей, камфортнага асяроддзя пражывання, разгалінаванай транспартнай і сацыяльнай інфраструктуры за межамі сталіцы і абласных цэнтраў; умацаванне прамысловасці праз мадэрнізацыю традыцыйных вытворчасцей, фарміраванне новых высокатэхналагічных галін, паглыбленне перапрацоўкі мясцовых сыравінных рэсурсаў.

У ліку ключавых напрамкаў – павышэнне канкурэнтаздольнасці аграпрамысловага комплексу праз узмацненне дысцыпліны землекарыстання, укараненне эфектыўных тэхналогій і лічбавізацыя, паглыбленне кааперацыі ў вытворчасці сельскагаспадарчай прадукцыі і прадуктаў харчавання; дынамічнае развіццё сферы паслуг праз развіццё транзітнага патэнцыялу і лагістыкі, пашырэнне ўнутранага і ўязнога турызму, павышэнне якасці і даступнасці сацыяльных паслуг; лічбавая трансфармацыя праз інтэграцыю інфармацыйна-камунікацыйных і перадавых вытворчых тэхналогій ва ўсе сферы жыццядзейнасці, павышэнне лічбавай пісьменнасці насельніцтва.

У дакуменце адзначаецца, што актыўная знешнеэканамічная палітыка будзе ажыццяўляцца праз пашырэнне экспарту на новыя рынкі, развіццё ўзаемавыгаднай эканамічнай інтэграцыі ў межах Саюзнай дзяржавы, ЕАЭС і СНД, умацаванне стратэгічнага супрацоўніцтва з КНР.

Ключавымі эканамічнымі фактарамі ў бягучай пяцігодцы будуць эфектыўнае размеркаванне рэсурсаў, удасканаленне сістэмы кіравання дзяржактывамі, роўнае развіццё арганізацый усіх формаў уласнасці. Аднак дзяржава не стане пазбаўляцца ад уласнасці толькі ва ўгоду знешнім саветам. Прадпрыемствам, якія належаць краіне, будзе гарантаваная абарона, а іх працаўнікам – упэўненасць у захаванні рабочых месцаў. Галоўнымі ў сацыяльна-эканамічнай палітыцы застануцца надзённыя пытанні жыцця людзей – справядлівае цэнаўтварэнне, прымальныя тарыфы на асноўныя паслугі, эфектыўная занятасць і забеспячэнне годнай аплаты працы.

УНС пастанаўляе даручыць дзяржаўным органам прыняць вычарпальныя меры па дасягненні пастаўленай мэты і рэалізацыі прыярытэтных напрамкаў сацыяльна-эканамічнага развіцця краіны. У сферы грамадска-палітычнага развіцця – ухваліць прапановы па забеспячэнні ўдзелу шырокіх слаёў насельніцтва ў распрацоўцы і рэалізацыі найважнейшых напрамкаў дзяржаўнай палітыкі, прызнаўшы Усебеларускі народны сход найвышэйшай формай народнага прадстаўніцтва з заканадаўчым замацаваннем яго асаблівага прававога статусу; па стварэнні Канстытуцыйнай камісіі, у склад якой увойдуць прадстаўнікі дзяржаўных органаў, юрыдычнай грамадскасці, розных галін эканомікі і сацыяльнай сферы.

Дадзенай камісіі ў 2021 годзе даручаецца распрацаваць прапановы па змене Канстытуцыі Беларусі для іх наступнага вынясення на ўсенароднае абмеркаванне і рэспубліканскі рэферэндум; па пераразмеркаванні паўнамоцтваў паміж дзяржаўнымі органамі, у тым ліку органамі мясцовага кіравання і самакіравання, па ўзмацненні ролі палітычных партый у жыцці краіны; падтрымцы стваральных ініцыятыў грамадзянскай супольнасці, накіраваных на рашэнне канкрэтных сацыяльна-эканамічных праблем, павышэнне якасці жыцця людзей, садзейнічанне найбольш поўнаму раскрыццю творчага патэнцыялу моладзі; распрацоўцы праграмы патрыятычнага выхавання насельніцтва, сцвярджэнні ў грамадстве традыцыйных духоўна-маральных каштоўнасцяў і ўстановак беларускага народа.

У сямідзённы тэрмін рэзалюцыя будзе накіравана Прэзідэнту для разгляду і прыняцця неабходных рашэнняў.

БЕЛТА