Пытанні і перспектывы развіцця турыстычнай сферы разглядзелі на нарадзе ў Магілёўскім аблвыканкаме

Абласную нараду аб бягучай сітуацыі і перспектывах развіцця турыстычнай сферы рэгіёна правёў сёння старшыня Магілёўскага аблвыканкама Анатоль Ісачанка. Удзел у ёй прынялі кіраўнікі структурных падраздзяленняў аблвыканкама, старшыні гаррайвыканкамаў і іх намеснікі, якія курыруюць пытанні сацыяльнай сферы і эканомікі; начальнікі аддзелаў спорту і турызму гарвыканкамаў, загадчыкі сектараў спорту і турызму райвыканкамаў; галоўныя спецыялісты райвыканкамаў, якія курыруюць пытанні фізічнай культуры, спорту і турызму, іншыя члены міжведамасных экспертна-каардынацыйных саветаў па турызме пры гаррайвыканкамах, прадстаўнікі турыстычнай індустрыі.

Адкрываючы пасяджэнне, Анатоль Ісачанка адзначыў, што ў сённяшніх абставінах важна мець дакладнае ўяўленне, якім на Магілёўшчыне бачыцца развіццё сферы, у якім кірунку мяркуецца рухацца. Таксама ён падкрэсліў, што патэнцыял для гэтага ёсць: у вобласці дастаткова аб’ектаў, вартых таго, каб пра іх расказвалі і іх паказвалі. Аднак ёсць неабходнасць перагледзець некаторыя падыходы ў працы.

Паводле звестак упраўлення спорту і турызму аблвыканкама, аб’ём экспарту турыстычных паслуг за студзень-верасень, паводле папярэдніх падлікаў, склаў звыш $2,6 млн з тэмпам росту 142% да аналагічнага перыяду мінулага года. Зводны мэтавы паказчык па вобласці на 2022 год узгоднены ў памеры $4,2 млн.

У цяперашні час на тэрыторыі вобласці атрымалі пэўнае развіццё такія віды турызму, як санаторна-аздараўленчы, культурна-пазнавальны, аграэкатурызм, гастранамічны, дзелавы, медыцынскі, паляўнічы, прамысловы, рэлігійны, спартыўны і экалагічны, якія ў той ці іншай меры з’яўляюцца прыярытэтнымі для пэўных тэрыторый.

«У мэтах прасоўвання сваіх паслуг на знешніх рынках на працягу года суб’екты турыстычнай індустрыі вобласці актыўна прымалі ўдзел у працы выстаў і круглых сталоў як у анлайн, так і ў афлайн фарматах. У 2022 годзе рэалізавана больш за восем маркетынгавых мерапрыемстваў, – адзначыў начальнік упраўлення спорту і турызму аблвыканкама Сяргей Новікаў. – З улікам сітуацыі, якая складваецца на знешніх рынках турызму, асноўныя намаганні трэба сканцэнтраваць на ўнутраным турызме.

Пытанні развіцця ўнутранага турызму былі дэталёва разгледжаны на пасяджэнні Міжведамаснага экспертна-каардынацыйнага савета па турызме пры Магілёўскім аблвыканкаме 10 кастрычніка, дадзены адпаведныя даручэнні.

Нам трэба будзе правесці значную працу па прасоўванні турыстычнага патэнцыялу Магілёўшчыны як на знешніх рынках, так і ўнутры краіны і прыкласці значныя намаганні па развіцці турыстычнай інфраструктуры, якая задавальняе патрэбы ўсіх катэгорый насельніцтва. У тым ліку за кошт стварэння турысцка-інфармацыйных цэнтраў. Таксама павышаную ўвагу неабходна надаць напаўненню шматфункцыянальнага сэрвісу анлайн-браніравання падарожжаў і адпачынку па Беларусі VETLIVA і турыстычных парталаў Планета Беларусь, БеларусТрэвел інфармацыяй аб турыстычным патэнцыяле гарадоў і раёнаў Магілёўскай вобласці.

Дарэчы, вялікі патэнцыял для развіцця ў рэгіёне мае прамысловы турызм. Значныя змены зведала заканадаўства ў сферы аграэкатурызму. Што таксама дазваляе паспяхова рэалізаваць праекты ў плане развіцця сельскіх тэрыторый, а таксама забеспячэння занятасці насельніцтва на вёсцы».

У вобласці ажыццяўляюць экскурсійную дзейнасць 67 атэставаных экскурсаводаў і 1 гід-перакладчык, які валодае англійскай мовай.

«Наша задача сёння – разгледзець сітуацыю аб становішчы спраў у турызме ў рэгіёне. Знайсці слабыя месцы і надаць ім павышаную ўвагу. Я бачу наш патэнцыял у прасоўванні турыстычнага прадукту як на ўнутраных, так і на знешніх рынках, – падзяліўся меркаваннем намеснік начальніка ўпраўлення спорту і турызму аблвыканкама Вадзім Брэжэзінскі. – На Магілёўшчыне шмат аб’ектаў, якія заслугоўваюць увагі турыстаў, і яны здольныя выклікаць павышаны турыстычны попыт. Зараз мы надаём увагу фарміраванню выразнай сістэмы інфармавання спажыўцоў аб турыстычных паслугах вобласці.

Безумоўна, брэндавыя падзейныя мерапрыемствы ў нашай вобласці выклікаюць цікавасць без якой-небудзь асаблівай рэкламы. Гэта сталыя асновы і традыцыі, якія працуюць самі на сябе. Аднак у апошні час з’явілася маса новых падзейных мерапрыемстваў і аб’ектаў, якія патрабуюць прасоўвання. І ў гэтым заключаецца наша асноўная задача.

Акрамя таго, патрабуе намаганняў па далейшым удасканаленні інфраструктура, паколькі турыст у цяперашні час прывучаны да высокіх стандартаў адпачынку. Упэўнены, што, нягледзячы на знешнія перашкоды, Магілёўшчына зойме сваё годнае месца на турыстычнай карце нашай краіны».

У сваю чаргу, дырэктар ДКУП «Магілёўаблтурыст» Алена Карпенка адзначыла, што падзеі, звязаныя з пандэміяй і абмежаваннямі ўезду і выезду, памянялі адносіны людзей да рэгіянальнага турызму, пераарыентавалі турыстычныя патокі.

«Так, попыт на паездкі ўнутры краіны вырас. Людзі ўсё часцей сталі цікавіцца такой магчымасцю, бо гэта бяспечна, блізка, нядорага і цікава. Тым не менш, рэклама патрэбна, у тым ліку сацыяльная, – падкрэсліла яна. – У Магілёве, на мой погляд, не хапае білбордаў з нашымі турыстычнымі аб’ектамі. Людзі часам пра іх проста не ведаюць. Але, на шчасце, у апошні час часта пра нашы найпрыгажэйшыя месцы расказваюць сродкі масавай інфармацыі. І ўсё ж неабходна, каб гэта інфармацыя часцей траплялася на вочы патэнцыйных турыстаў як з ліку жыхароў рэгіёна, так і з ліку гасцей нашага абласнога цэнтра. Пра гэта трэба больш заяўляць.

Зараз для прасоўвання нашага ўнутранага, рэгіянальнага турызму, на мой погляд, неабходна, у першую чаргу, паміж гарадамі і раёнамі заключаць пагадненні і арганізоўваць узаемныя турыстычныя паездкі адзін да аднаго.

Нам ёсць чым ганарыцца. Гэта Магілёўскі заасад, і Блакітная крыніца, і Крычаўскі палац Пацёмкіна. Годная экспазіцыя прадстаўлена ў музеі В. К. Бялыніцкага-Бірулі ў Магілёве. І мемарыял у Борках, які сёлета быў вельмі запатрабаваны ў турыстаў. Партызанскі лагер ва Усакіна, дзе праводзіцца тэатралізаваная рэканструкцыя ваенных дзеянняў. Хуткімі тэмпамі ідзе рэканструкцыя Жыліцкага палаца Булгакаў у Кіраўскім раёне, які складзе годную канкурэнцыю Мірскаму і Нясвіжскаму замкам. Гэта ўражлівы палац, яго ўжо наведала дастатковая колькасць турыстаў. Аб’ектаў дастаткова. Пералічваць можна шмат. Больш за 50 маршрутаў існуе па Магілёўскай вобласці. Прычым яны могуць быць як аўтамабільныя, так і веласіпедныя, пешаходныя, як групавыя, так і індывідуальныя. З’явіліся маршруты на байдарках па Чыгірынскім вадасховішчы. Маюцца яркія аб’екты прамысловага турызму, што таксама прываблівае турыстаў. Усю гэтую інфармацыю можна атрымаць у нашым інфармацыйна-турыстычным цэнтры».

З мэтай сістэматызацыі падыходаў у развіцці турызму ў вобласці упраўленнем спорту і турызму аблвыканкама сумесна з зацікаўленымі сфарміраваны праект плану мерапрыемстваў па развіцці ўнутранага і ўязнога турызму ў Магілёўскай вобласці на 2022–2025 гады.

Юлія Таранава, фота Галіны Гаўрыловіч