Расія ў поўным аб’ёме аднавіла авіязносіны з Беларуссю

З сённяшняга дня Расія здымае ўсе абмежаванні на авіязносіны з Беларуссю і аднаўляе іх з Іспаніяй, Іракам, Кеніяй і Славакіяй. Такое рашэнне раней прыняў аператыўны штаб па барацьбе з каранавірусам, перадае ТАСС.

Такім чынам, паветраныя зносіны паміж Расіяй і Беларуссю, часова абмежаваныя ў сувязі з распаўсюджваннем каранавіруса, будуць адноўленыя ў поўным аб’ёме.

У чэрвені Расія павялічыла колькасць рэгулярных рэйсаў у авіязносінах з Беларуссю да 10 на тыдзень. З 1 жніўня Расійская Федэрацыя падвоіла колькасць рэйсаў з Масквы ў Мінск, а таксама павялічыла іх колькасць з Сочы і Краснадара.

Што тычыцца іншых замежных напрамкаў, у Ірак самалёты будуць лятаць па маршруце Масква–Багдад два разы на тыдзень, у Іспанію будзе ажыццяўляцца па чатыры рэйсы на тыдзень з Масквы ў Мадрыд і Барселону, а таксама па два разы на тыдзень у Малагу і Алікантэ. У Кенію самалёты будуць лятаць з Масквы ў Найробі двойчы на тыдзень, а ў Славакію будзе чатыры рэйсы на тыдзень па маршруце Масква – Браціслава і два рэйсы на тыдзень з Санкт-Пецярбурга ў Браціславу.

Раней Расія ўжо аднавіла авіязносіны з 53 краінамі. Пры гэтым прыпыненне авіязносін з Танзаніяй падоўжана да 1 кастрычніка ў сувязі з эпідсітуацыяй у краіне.

БЕЛТА