Раскрыць летапіс нашай краіны ў сучасным фармаце і знайсці карціну па вершах – музей Масленікава запрашае пазнавальна правесці выхадныя

Магілёўскі абласны мастацкі музей ім. П.У. Масленікава запрашае магіляўчан і гасцей горада на традыцыйныя «Музейныя сустрэчы па выхадных». Пра гэта паведамілі ва ўстанове культуры.

Так, у суботу, 23 сакавіка з 13:00 да 14:00 запланавана правядзенне занятку «Таямнічы водбліск стагоддзяў». Наведвальнікаў чакае выстава галаграм унікальных прадметаў мінулага. Сярод экспанатаў - Пояс Вітаўта XV стагоддзя, упрыгожванні старажытных славян, якія налічваюць больш за 500 гадоў. Унікальныя прадметы раскрыюць гасцям музея летапіс нашай краіны ў сучасным фармаце. Па словах супрацоўнікаў музея, гэтыя скарбы ў правільным асвятленні гуляюць асаблівымі фарбамі.

У нядзелю, 24 сакавіка з 13:00 да 14:00 наведвальнікаў чакае інтэрактыў «У гасцях у мастака». Супрацоўнікі музея працягваюць адкрываць гасцям новыя грані ў творчасці Паўла Васільевіча Масленікава. У карціннай галерэі Народнага мастака Беларусі пройдзе экскурсія з элементамі інтэрактыву. Наведвальнікам прапануюць паўдзельнічаць у гульні «Знайдзі карціну», у форме вершаў і загадак адшукаць патрэбны твор, а таксама разгадаць крыжаванкі

Папярэдні запіс у буднія дні па тэлефонах: 8 (0222) 62-24-25, 8 (0222) 71-17-49.

Галіна Гаўрыловіч