«Разам»: спартакіяду для падлеткаў правялі ў рамках антынаркатычнай акцыі

Маштабнае спартыўнае мерапрыемства прайшло сёння ў Магілёўскім дзяржаўным ордэне Працоўнага Чырвонага Сцяга агралесатэхнічным каледжы імя К.П. Арлоўскага. Правялі яго ў рамках абласной антынаркатычнай акцыі «Разам» у мэтах прафілактыкі супрацьпраўных паводзін непаўналетніх, прапаганды актыўнага адпачынку і здаровага ладу жыцця.

Адным з арганізатараў спартыўнай сустрэчы выступіла УУС Магілёўскага аблвыканкама. Сярод членаў журы былі намеснік начальніка ўпраўлення аховы правапарадку і прафілактыкі Вячаслаў Кардымон і старшы інспектар па асобых даручэннях УАПП Ганна Шматава.

У спартыўнай зале каледжа спаборнічалі тры каманды па 8 чалавек з ліку навучэнцаў агульнаадукацыйных школ раёна, выхаванцаў агралесатэхнічнага каледжа, прафесійна-тэхнічнай вучэльні №2 дрэваапрацоўкі. Дарэчы, капітанам кожнай з каманд быў дзейны супрацоўнік органаў унутраных спраў.

Спартакіяда выдалася яркай і эмацыйнай. Рабяты спаборнічалі ў хуткасці, трапнасці і спрыту. Дэманстравалі свае здольнасці працаваць у камандзе, імкнучыся максімальна праявіць сябе на кожным з этапаў. У зале панавала атмасфера здаровага саперніцтва. Заўзятары актыўна падтрымлівалі сваіх таварышаў, скандуючы назовы каманд і апладыруючы перамогам.

У выніку ўпартай барацьбы пасля сямі выпрабаванняў вызначыўся лідэр спартакіяды: ім стала каманда агралесатэхнічнага каледжа. 2 месца занялі хлопцы прафтэхвучылішча №2 дрэваапрацоўкі, 3 месца - зборная вучняў сярэдніх школ Магілёўскага раёна.

На памяць аб сустрэчы ўсе ўдзельнікі атрымалі дыпломы і салодкія падарункі.

mogilev.mvd.gov.by/ru