Рэгіянальны этап нацыянальнага конкурсу прыгажосці «Міс Беларусь» пройдзе ў Магілёве 17 студзеня

Рэгіянальны этап нацыянальнага конкурсу прыгажосці «Міс Беларусь» пройдзе ў Магілёве 17 студзеня. Пра гэта паведамілі ў Магілёўскім гарадскім цэнтры культуры і вольнага часу.

На конкурс запрашаюцца дзяўчаты з добрымі знешнімі данымі ва ўзросце ад 18 да 27 гадоў, якія ніколі не былі ў шлюбе і не маюць дзяцей. Таксама ў ліку патрабаванняў - грамадзянства Беларусі і пастаяннае пражыванне на тэрыторыі краіны, рост не ніжэйшы за 172 см, адсутнасць татуіровак і пірсінгу.

Да ўдзелу ў конкурсе не дапускаюцца ўладальніцы тытула «Міс Беларусь» і пераможцы ў намінацыях папярэдніх нацыянальных конкурсаў прыгажосці.

Для ўдзелу на рэгіянальным этапе неабходна запоўніць анкету і даслаць яе да правядзення кастынгу на электронны адрас: gckmog@mail.ru альбо gck@gck-mogilev.by. Дадатковая інфармацыя размешчана на сайце гарадскога цэнтра культуры і вольнага часу, таксама яе можна атрымаць па тэлефоне 8 (0222) 42-93-38.

На кастынг удзельніцам неабходна прыйсці без макіяжу і ўзяць з сабой туфлі на высокім абцасе, купальнік і гумку для валасоў.

Адбор удзельніц стартуе ў 16.00 у Магілёўскім гарадскім цэнтры культуры і вольнага часу па адрасе: вул. Першамайская, 34.

БЕЛТА