Рэпартаж з Асіповічаў – сталіцы нашай артылерыі

Асіповічы – сталіца нашай артылерыі. Без лішняй сціпласці. Яшчэ ў савецкія часы ў горадзе была сканцэнтравана артылерыйская дывізія. Зараз жа ў ваенным гарадку Паўднёвы суседнічаюць 51-я гвардзейская артылерыйская брыгада, 336-я рэактыўная артылерыйская брыгада і 465-я ракетная брыгада.

– Наша задача – агнявая падтрымка агульнавайсковых злучэнняў і вайсковых частак: пяхоты, танкаў, – тлумачыць камандзір 51-й гвардзейскай артылерыйскай брыгады гвардыі палкоўнік Аляксей Ратушны. – На ўзбраенні брыгады стаяць 152-міліметровыя самаходныя гарматы 2С5 «Гіяцынт-З», буксіравальныя гаўбіцы 2А65 «Мста-Б» такога ж калібру і рэактыўна-артылерыйскі дывізіён сістэм залпавага агню «Ураган».

Асаблівы гонар брыгады – палігон Асіповіцкі. У гэтым годзе ў палігона з’явілася новая ультрасучасная камп’ютарызаваная дырэктрыса для танкаў і БМП, з рухомымі мішэнямі. Прызначаны палігон для артылерыі, але тут праводзяць вучэнні і іншыя роды войскаў і праходзяць выпрабаванні новай тэхнікі. Акрамя ўсяго іншага, палігон Асіповіцкі – гэта яшчэ і месца падрыхтоўкі каманды мінамётчыкаў «Майстры артылерыйскага агню» прэстыжнага спаборніцтва «Вайсковыя міжнародныя гульні».

Прагулка па парку

Вайскоўцы – людзі канкрэтныя, усё ў іх па плане. І свята таксама. А пакуль надзённая праца не чакае. Большая частка асабістага складу цяпер у парку, рыхтуе тэхніку да зімы.

У боксах кіпіць праца. Зарычала самаходка, выязджае з варот для фотасесіі. Побач – камандзірская машына кіравання. Дарэчы, у яе два рухавікі – другі выпрацоўвае электрычнасць, якая бяжыць па яе венах. У баі камандзір дывізіёна і камандзіры артылерыйскіх батарэй заўсёды з пяхотай на пярэднім краі, кіруюць агнём сваіх падраздзяленняў. Электронных памочнікаў няма, усе разлікі даных для стральбы ў галаве, дапамагаюць хіба што механічныя сістэмы (напрыклад, лазерны далямер, бусоль) і глыбокія веды ў матэматыцы.

Звычайна машыны кіравання – кабіны на шасі грузавікоў. А тут, па сутнасці, голая браня і гусенічная хадавая частка. Камфорту камандзіру замала, сядзіш, як у танку, але ў баі камфорт далёка не галоўнае, куды важней праходнасць.

Амаль як дома

Ужо пачалася адпраўка прызыўнікоў у войскі. Абжыве маладое папаўненне і казармы 51-й гвардзейскай артылерыйскай брыгады. За свае казармы артылерыстам не сорамна. Камфортныя і ўтульныя, са свежым рамонтам і сістэмамі відэаназірання. Раней салдатам і марыць не даводзілася аб душавых кабінах у мыйных памяшканнях або гарачай вадзе ў кранах. А сёння – калі ласка, усе выгоды.

У гэтым годзе ў брыгадзе абнавілі выдатна абсталяваны медыцынскі пункт: кіслародны інгалятар, неабходны пры атручванні вуглякіслым газам, побач тэрмакантэйнеры для падтрымання патрэбнай тэмпературы раствораў, а яшчэ партатыўны прыбор для ЭКГ, дэфібрылятар, укладкі для аказання неадкладнай дапамогі. Медыцынскі пункт можа пахваліцца і ўласнай лабараторыяй. Яе значнасць цяжка пераацаніць. Бо, як мы ведаем па сваім вопыце, захварэў – перш за ўсё ўрач адпраўляе здаць аналіз крыві.

– Таксама ў нас ёсць і фізіятэрапеўтычнае аддзяленне: дыядынамічныя токі, электрафарэз, ультрагук, лазератэрапія, УВЧ, кварц, – дапаўняе пералік пераваг абноўленай санчасткі начальнік медыцынскай службы падпалкоўнік Ангеліна Саўрыцкая.

Сваё прафесійнае свята артылерысты падзялілі разам з жыхарамі Асіповіч. Прайшлі выстава ўзбраення і ваеннай тэхнікі, ваенізаваныя конкурсы, эстафеты, паказальныя выступленні. На цэнтральнай плошчы выступіў аркестр артылерыйскай брыгады, які, дарэчы, у мінулым месяцы заняў першае месца на конкурсе сярод усіх духавых аркестраў Узброеных Сіл у намінацыі «Аркестры з колькасцю штата да 16 чалавек». У трэк-лісце толькі хіты. Парадавалі жыхароў, выканаўшы кампазіцыі з рэпертуару Ціны Тэрнер, песеньку франтавога шафёра ў джазавай апрацоўцы і самавітае папуры з трынаццаці твораў: ад хітоў «Металікі» да галоўнай тэмы з найпапулярнейшага заходняга серыяла «Гульня тронаў».

СБ