Рэспубліканская акцыя «Не пакідайце дзяцей адных!» стартуе ў Магілёўскай вобласці 3 мая

Дзяцінства – самая яркая, вясёлая і бесклапотная пара жыцця. Падрастаючы, дзеці адаптуюцца ў навакольным свеце, дзень за днём спазнаючы нешта новае. Як у побыце, так і на вуліцы, іх, нароўні з цікавымі адкрыццямі, чакаюць шматлікія небяспекі. Своечасова навучыць дзяцей асновам бяспекі жыццядзейнасці, правілам паводзін у надзвычайных сітуацыях – значыць зрабіць іх дзяцінства бяспечным.

З мэтай прыцягнення ўвагі да праблемы дзіцячага свавольства з агнём і гібелі дзяцей на пажарах, зніжэння колькасці надзвычайных сітуацый з удзелам дзяцей і стварэння іх агульнай бяспекі з 3 мая ў Магілёўскай вобласці стартуе Рэспубліканская прафілактычная акцыя «Не пакідайце дзяцей адных!», прымеркаваная да Міжнароднага Дня сям’і і Дня абароны дзяцей.

Як расказала старшы інспектар абласнога ўпраўлення МНС Вольга Нехарошых, акцыя ўключае 4 этапы.

1-ы: з 3 па 15 мая. Мэтавая аўдыторыя гэтага этапу – бацькі і іх дзеці. Акцыя праводзіцца на аб’ектах з масавым знаходжаннем людзей (гандлёва-забаўляльныя цэнтры, кінатэатры, дзіцячыя тэатры, у дзіцячых крамах «Буслік», «Kari kids», на адкрытых пляцоўках і інш.). Выратавальнікі запрашаюць прыняць удзел у сямейным спартыўным свяце «Мама, тата, мы – у бяспецы моцныя!».

2-і: 17–21 мая – праводзіцца ва ўстановах аховы здароўя (тэрытарыяльныя паліклінікі): «Кабінеты здаровага дзіцяці», «Школы мацярынства»;

– ва ўстановах адукацыі (школы ранняга развіцця, цэнтры дашкольнай адукацыі); цэнтрах пазашкольнай адукацыі (Палацы дзяцей і моладзі); у фізкультурна-аздараўленчых комплексах, спартыўных школах (пакоі чакання для бацькоў);

– у дашкольных установах, пачатковых класах агульнаадукацыйных устаноў (бацькоўскія сходы). Мэтавая аўдыторыя этапу – будучыя і маладыя мамы, бацькі.

3-і: 24 мая – 28 мая – ратавальнікі з забаўляльна-прафілактычнай місіяй наведаюць шматдзетныя сем’і, дзіцячыя дамы сямейнага тыпу, дзіцячыя забаўляльныя цэнтры, арганізацыі грамадскага харчавання. У раённых цэнтрах мерапрыемствы будуць праходзіць у раённых дамах культуры.

4-ы: з 31 мая па 1 чэрвеня. Прымеркаваны да Міжнароднага дня абароны дзяцей. Акцыя пройдзе на адкрытых пляцоўках у месцах з масавым знаходжаннем людзей.

Хай дзяцінства будзе бяспечным!

Рэд.