Спецпаказ фільма «Недатыкальнасць» і сустрэча з творчай групай стужкі пройдуць 23 красавіка ў Магілёве

Спецпаказ фільма «Недатыкальнасць» і сустрэча з творчай групай стужкі пройдуць 23 красавіка ў Магілёўскім кінатэатры «Ветразь». Мерапрыемства адбудзецца ў межах святкавання 95-годдзя беларускага кіно, паведамілі на прадпрыемстве «Магілёўкінавідэапракат».

На сустрэчу з гледачамі прыедуць рэжысёр, заслужаны дзеяч мастацтваў Дзмітрый Зайцаў, акцёр, заслужаны дзеяч мастацтваў Аляксандр Кашпераў, кампазітар, спявак, мастак Алег Арлоў.

Дэтэктыў выйшаў у пракат у 2017 годзе. Кінакарціна знятая рэжысёрамі-пастаноўшчыкамі, аператарамі, сцэнарыстамі і прадзюсерамі Дзмітрыем Зайцавым і Юрыем Елхавым. Сцэнарый «Недатыкальнасці» заснаваны на апавяданні амерыканскага пісьменніка Роберта Колбі «Голас у ночы», аднак дзеянне адаптавана пад беларускую рэчаіснасць. Галоўныя ролі выканалі акцёры Аляксандр Кашпераў і Вольга Рэптух.

Фільм закранае сацыяльныя, маральна-этычныя і маральныя праблемы сучаснасці. Па сюжэце высокапастаўлены чыноўнік, з уладай і сувязямі, жыве ў сваё задавальненне ў дарагім загарадным асабняку, здзяйсняе крымінальныя злачынствы і не нясе за гэта ніякай адказнасці. У героя незвычайнае хобі. Ён знаёміцца па тэлефоне з жанчынамі, запрашае іх у рэстаран, да сябе дадому... Што адбываецца далей, гледачы даведаюцца, паглядзеўшы фільм «Недатыкальнасць», які з’яўляецца свайго роду папярэджаннем, як не апынуцца ахвярай уласнай даверлівасці, трапляючы ў рукі ашуканцаў.

Кінакарціна ўдастоена Гран-пры 20-га Міжнароднага фестывалю дэтэктыўных фільмаў «Дэтэктыўфест», які праходзіў у Маскве ў красавіку 2018 года.

На працягу года стужку будуць дэманстраваць у кінатэатрах Магілёва і вобласці.