RU BY EN 中文
Twitter Instagram

Спецыялізаваная будаўнічая выстава «Дом. Дача. Дызайн» пройдзе ў Магілёве 14-16 сакавіка

IX Рэспубліканская спецыялізаваная будаўнічая выстава «Дом. Дача. Дызайн» пройдзе ў Магілёўскім СК «Алімпіец» 14-16 сакавіка. Пра гэта паведамілі ў Магілёўскім аддзяленні Беларускай гандлёва-прамысловай палаты.

Паводле слоў суразмоўцаў, экспазіцыя традыцыйна адкрывае будаўнічы сезон. Яна з’яўляецца значным мерапрыемствам, закліканым унесці ўклад у распаўсюджванне інфармацыі аб дасягненнях будаўнічай індустрыі і накіравана на прыцягненне ў рэгіён сучасных будаўнічых матэрыялаў і тэхналогій.

Выстава будзе ўключаць тэматычныя раздзелы, прысвечаныя сучасным будаўнічым, аздобным матэрыялам і тэхналогіям, інструментам і будаўнічым вырабам, энергазахавальнаму і ацяпляльнаму абсталяванню, дахавым, цеплаізаляцыйным, гідраізаляцыйным матэрыялам, сантэхніцы, сістэмам відэаназірання, ахоўнай сігналізацыі, ачысткі вады, мэблі, камінам, вокнам, дзвярам і інш.

Штодня падчас выставы запланаваны майстар-класы па архітэктурным макетаванні, кансультацыі ў галіне ландшафтнага дызайну і архітэктурнага праектавання. Таксама можна будзе атрымаць рэкамендацыі высокакваліфікаваных спецыялістаў у будаўніцтве і па паслугах страхавання.

«Прадстаўнікі прадпрыемстваў і арганізацый, якія працуюць у сферы будаўніцтва і дызайну, змогуць знайсці тут дзелавых партнёраў, умацаваць адносіны, якія ўжо склаліся, а таксама за кароткі час прадэманстраваць сваю прадукцыю зацікаўленым у яе набыцці, – адзначылі суразмоўцы. – Наведвальнікі ж атрымаюць бясплатныя кансультацыі спецыялістаў, азнаёмяцца з новымі тэхналогіямі і таварамі беларускіх прадпрыемстваў будаўнічай галіны. Выстава будзе карысная і тым, хто збіраецца будаваць дом ці рабіць рамонт».

З кожным годам колькасць удзельнікаў выставы «Дом. Дача. Дызайн» расце. Так, у 2018 годзе ў мерапрыемстве прыняло ўдзел каля 60 беларускіх прадпрыемстваў. Сярод іх былі як буйныя кампаніі, якія з’яўляюцца вядучымі ўдзельнікамі рынку, так і невялікія прыватныя арганізацыі. За 3 дні экспазіцыю наведала больш за 4 тыс. спецыялістаў і жыхароў Магілёўскай вобласці, а таксама прадстаўнікі расійскіх арганізацый са Смаленска.

Пры выкарыстанні матэрыялаў актыўная гіперспасылка на mogilev-region.gov.by абавязковая