Старшыня Магілёўскага аблвыканкама Анатоль Ісачанка сустрэўся з актывам Асіповіцкага і Клічаўскага раёнаў

Сёння праходзіць рабочая паездка старшыні Магілёўскага аблвыканкама Анатоля Ісачанкі ў Асіповіцкі і Клічаўскі раёны.

Падчас сустрэчы з актывам Асіповіцкага раёна – кіраўніцтвам і спецыялістамі райвыканкама, дэпутатамі, моладдзю, прадстаўнікамі праваахоўных органаў, грамадскасці – у сваім выступленні губернатар даходліва патлумачыў, чаму наспела неабходнасць унясення змяненняў і дапаўненняў у Канстытуцыю. Змяняецца структура грамадства, з’явіліся новыя кірункі ў эканоміцы, сфарміраваўся сярэдні клас, выраслі новыя пакаленні маладых беларусаў. Сёння прадстаўнікі малога і сярэдняга бізнесу падужэлі, уносяць істотную долю ў бюджэт рэгіёна.

Анатоль Ісачанка таксама нагадаў аб неабходнасці выканання закона кожным:

– Давайце думаць адзін пра аднаго, жыць у межах заканадаўства. Закон пачынаецца з вуліцы, дарогі, паркоўкі.

Гаворка ішла і аб узаемадзеянні дзяржавы і бізнесу, аб прэферэнцыях для прадпрымальнікаў, у прыватнасці, у сельскай мясцовасці. Анатоль Міхайлавіч падкрэсліў, што, вядома, дзяржава гатова дапамагчы тым, хто толькі пачынае сваю справу, але і прадпрымальнікі, у сваю чаргу, устаўшы на ногі, павінны падтрымліваць дзяржаву, каб развівалася ўзаемавыгаднае партнёрства.

Асаблівую ўвагу ў сваім выступленні старшыня Магілёўскага аблвыканкама надаў захаванню гістарычнай памяці. На прыкладзе Украіны ён растлумачыў, што адбываецца ў краінах, дзе перапісваюць гісторыю.

Ён нагадаў прысутным, што беларусам, усяму народу, у гэту палітычную кампанію трэба будзе вызначыць лёс краіны на дзесяцігоддзі.

Прысутныя – больш за 300 чалавек – слухалі выступленне Анатоля Ісачанкі з непадробнай цікавасцю. У іх назапасілася нямала пытанняў да губернатара. Асабліва актыўнымі праявілі сябе работнікі сферы адукацыі, моладзь. Пыталіся, да прыкладу, як прывабіць бацькоў да выхавання сваіх дзяцей, бо чамусьці многія з іх упэўнены, што выхаванне – абавязак толькі школы. Губернатар лічыць, што гэта павінны быць сумесныя праграмы, рэкамендуе мамам і татам праводзіць са сваімі дзецьмі больш часу, прымаць удзел у гульнях і конкурсах.

На пытанне пра тое, што можна назваць грамадзянскай супольнасцю, губернатар адказаў, што толькі тыя аб’яднанні, якія ўзаемадзейнічаюць з дзяржавай, ажыццяўляюць сваю дзейнасць, у асноўным, за сяброўскія ўнёскі і не фінансуюцца замежнымі фондамі. Тых жа арганізацый, якія парушаюць законы, ніяк не звязаныя з эканомікай сваёй краіны, г. зн. арганізацый, якія фінансуюцца звонку, быць у нас наогул не павінна.

Гаворачы аб знешняй палітыцы, Анатоль Ісачанка адзначыў:

– У нас ёсць саюзнікі, вернасць якіх праверана, – гэта Расія, Кітай. Нашы сістэмы каштоўнасцяў з гэтымі краінамі максімальна набліжаныя.

Менавіта з праверанымі краінамі-партнёрамі трэба будзе і ў далейшым будаваць яшчэ больш цесныя адносіны.

Таксама прысутныя на сустрэчы пыталіся пра будучае будаўніцтва ў Асіповіцкім раёне школы, станцыі абезжалезвання, цікавіліся тэрмінамі.

Губернатар адказаў, што станцый абезжалезвання ў гэтым годзе будзе пабудавана ў вобласці дваццаць. Што ж тычыцца іншых маштабных будоўляў, ён не стаў даваць невыканальных абяцанняў. Прапанаваў:

– Думаю, у кожнай раённай газеце трэба публікаваць, што будзе пабудавана ў раёне ў гэтым годзе, – да прыкладу, дарога, станцыя абезжалезвання або дзіцячы садок. Таксама будзем паведамляць, колькі ў нас грошай і колькі зможам аддаць. Каб усе вы бачылі, колькі маем і колькі ўкладваем, будзе наладжаны грамадскі кантроль. Бо мы павінны рабіць усё гэта разам з вамі за кошт эканомікі, падаткаў: больш сродкаў, чым мы маем, выдаткаваць немагчыма.

Людзі падзякавалі губернатару Анатолю Ісачанку за выступленне, адзначылі, што гаворыць ён не па шаблонах, а ўсёй даступнай мовай з пераканаўчымі прыкладамі, не пазбягае няпростых пытанняў, дае на іх дакладныя адказы.

Старшыня Магілёўскага аблвыканкама ў сваю чаргу падзякаваў прысутным – самай актыўнай, паважанай частцы насельніцтва Асіповіцкага раёна – і працягнуў сваю рабочую паездку. Наступная сустрэча праходзіла ў Клічаўскім раёне.

СБ