Старшыня Магілёўскага аблвыканкама Анатоль Ісачанка сустрэўся з фермерамі рэгіёна

Сустрэча старшыні аблвыканкама Анатоль Ісачанка з прадстаўнікамі фермерскіх гаспадарак рэгіёна адбылася сёння ў Магілёве. У ёй таксама прынялі ўдзел старшыня Магілёўскага абласнога Савета дэпутатаў Ірына Раінчык, памочнік Прэзідэнта – інспектар па Магілёўскай вобласці Леанід Мартынюк, першы намеснік старшыні Магілёўскага аблвыканкама Анатоль Уласевіч.

«Фермеры – гэта актыўная частка нашага сельскага насельніцтва, гэта тыя людзі, якія працуюць на зямлі. І нам сёння трэба выбудаваць адносіны так, каб гэтая праца была на карысць, – падкрэсліў Анатоль Ісачанка. – На тэрыторыі Магілёўскай вобласці 513 фермераў. І для эфектыўнага ўзаемадзеяння існуючаму Саюзу фермераў неабходна надаць большы статус, перадаўшы яму частку распарадчых і кантрольных функцый для выпрацоўкі канструктыўных прапаноў, каб стаць дзейсным механізмам для развіцця фермерскіх гаспадарак, злучным звяном паміж уладай і фермерамі. Каб мы разумелі, якія пытанні хвалююць фермераў, і разам маглі іх вырашаць. Фермерскія гаспадаркі сталі неад’емнай часткай харчовай бяспекі краіны. Дзяржава зацікаўлена ў іх развіцці. У сваім пасланні беларускаму народу і Нацыянальнаму сходу кіраўнік дзяржавы адзначыў, што сяло заўсёды будзе ў фокусе ўвагі і падтрымкі дзяржавы».

Падчас зносін шмат пытанняў ад фермераў паступала аб землеразмеркаванні. Анатоль Ісачанка выказаў сваё цвёрдае перакананне:

«Зямля павінна ўся быць задзейнічана, не павінна быць яе неэфектыўнага выкарыстання. І тут тры напрамкі, якія мы адпрацоўваем ў вобласці. Першы – буйныя гаспадаркі, якія стабільна працуюць і могуць дадаткова ўзяць для сябе зямлю і якасна яе апрацаваць. Другі напрамак – фермеры. Тыя, хто мае жаданне, рэсурс, магутнасці і хто сапраўды працуе. Мы таксама будзем ім усяляк дапамагаць, каб яны маглі атрымаць гэтую зямлю і эфектыўна на ёй працавалі. І трэці напрамак – гэта нашы інвестары. Іх таксама неабходна прывабліваць да працы на зямлі.

Сельская гаспадарка з гадамі відазмяняецца і, на мой погляд, будучыня за буйнатаварнай вытворчасцю з наладжаным замкнёным цыклам, пачынаючы ад вырошчвання сыравіны і заканчваючы перапрацоўкай. І фермерскімі гаспадаркамі, якія будуць займацца вырошчваннем гародніны, пладоў і ягад. У жывёлагадоўлі фермеры здольныя ўнесці свой уклад у развядзенне мясной і малочнай жывёлы, дробных жывёл (авечак, коз, трусоў) і пчалярства. Кожны павінен заняць сваю нішу. Са свайго боку мы гатовыя дапамагаць. Гэтыя два асноўныя напрамкі, лічу, павінны даць рух сельскай гаспадарцы.

Сельская гаспадарка павінна стаць бізнесам, сёння трэба навучыцца зарабляць на гэтым грошы».

Адносна асобных пытанняў, якія паступілі ад фермераў, старшыня аблвыканкама даручыў адказным за дадзеныя напрамкі ўзяць праблемы на кантроль і разабрацца, пры неабходнасці – з выездам на месца і арганізацыяй сходаў зацікаўленых асоб.

Аб’ём вытворчасці прадукцыі сельскай гаспадаркі ў сялянскіх (фермерскіх) гаспадарках Магілёўскай вобласці ў 2020 годзе ў параўнанні з 2010 годам павялічыўся ў супастаўных цэнах у 2,9 раза, у тым ліку прадукцыі раслінаводства – у 3,3 раза, жывёлагадоўлі – у 1,3 раза.

Узрасла і доля фермерскіх гаспадарак у агульным аб’ёме вытворчасці сельскагаспадарчай прадукцыі. У вытворчасці гародніны ў параўнанні з 2010 годам павялічылася ў 4,4 раза, бульбы – у 5,8 раза, збожжа – у 1,8 раза.

Удзельная вага вытворчасці агародніны ў агульнаабласным аб’ёме склала 10,5%, бульбы – 9,2%, збожжа – 6,6%, цукровых буракоў – 4,4%.

На пачатак 2022 года ў вобласці налічвалася 513 дзеючых сялянскіх (фермерскіх) гаспадарак. Як адзначыла ў сваім выступленні першы намеснік старшыні камітэта па сельскай гаспадарцы і харчаванні Магілёўскага аблвыканкама Вольга Прыстромская, за апошнія 10 гадоў іх колькасць павялічылася на 170 гаспадарак, або ў 1,5 разы.

«Найбольшае развіццё фермерства атрымала ў Магілёўскім, Бабруйскім, Шклоўскім, Чавускім і Горацкім раёнах, – адзначыла яна. – На 1 студзеня 2021 г. у карыстанні СФГ знаходзілася 57,6 тыс. гектараў сельскагаспадарчых угоддзяў, у тым ліку ворных – 42,6 тыс. гектараў. У параўнанні з 2010 годам сельскагаспадарчыя землі, занятыя фермерскімі гаспадаркамі, павялічыліся больш чым у 2 разы, ворныя – у 1,8 раза.

Для прадастаўлення сялянскім (фермерскім) гаспадаркам зямельных участкаў ва ўсіх раёнах вобласці быў сфарміраваны фонд пераразмеркавання зямель, з размяшчэннем звестак на афіцыйных сайтах райвыканкамаў. Усяго ў фонд пераразмеркавання зямель ўключана 95 зямельных участкаў агульнай плошчай 4397 га.

Асноўным напрамкам сельскагаспадарчай дзейнасці большасці (каля 60%) сялянскіх (фермерскіх) гаспадарак з’яўляецца раслінаводства. На яго долю прыпадае амаль 90% вырабленай фермерамі прадукцыі».

У 2021 годзе аказанне дзяржаўнай падтрымкі арганізацыям аграпрамысловага комплексу ажыццяўлялася ў межах Дзяржаўнай праграмы «Аграрны бізнес» на 2021–2025 гады, зацверджанай пастановай Савета Міністраў Рэспублікі Беларусь і дзяржаўнай праграмы па пераадоленні наступстваў катастрофы на Чарнобыльскай АЭС на 2021 2025 гады, зацверджанай пастановай Савета Міністраў Рэспублікі Беларусь, а таксама распараджэнняў кіраўніка дзяржавы. У 2021 годзе на фінансаванне мерапрыемстваў дзяржаўнай праграмы «Аграрны бізнес» арганізацыям аграпрамысловага комплексу Магілёўскай вобласці накіраваны сродкі абласнога бюджэту, у тым ліку на прадастаўленне субсідый (СФГ) на пагашэнне запазычанасці за набытыя таварна-матэрыяльныя каштоўнасці, пагашэнне запазычанасці перад ААТ «Прамагралізінг» па дагаворах фінансавай арэнды (лізінгу), прадастаўленне надбавак за вырабленую і рэалізаваную СФГ сельскагаспадарчую прадукцыю.

Таксама ў 2021 годзе на фінансаванне мерапрыемстваў дзяржаўнай праграмы развіцця аграрнага бізнесу арганізацыям аграпрамысловага комплексу Магілёўскай вобласці накіраваны сродкі рэспубліканскага бюджэту, у тым ліку на правядзенне комплексу работ, звязаных з вапнаваннем кіслых глеб, уключаючы набыццё вапнавых матэрыялаў і іх транспарціроўку, пагашэнне запазычанасці за паліва, адпушчанае з дзяржаўнага матэрыяльнага рэзерву, на першаснае ўладкаванне фермерскіх гаспадарак.

Юлія Таранава, фота Галіны Гаўрыловіч.