Стартаваў прыём заявак на турыстычны конкурс «Пазнай Беларусь»

Стартаваў XXIII Рэспубліканскі турыстычны конкурс «Пазнай Беларусь – 2025», паведамілі ў Нацыянальным агенцтве па турызме.

Прыём заявак працягнецца да 30 верасня. Прадугледжана 14 намінацый: «Я спазнаю Беларусь», «Экскурсавод года», «Турыстычная кампанія года», «Сродак размяшчэння года», «Санаторый года», «Аграэкасядзіба года», «Матэрыял года», «Музей года», «Фатаграфія года», «Аб'ект экалагічнага турызму года», «Аб'ект прамысловага турызму года», «Аб'ект рэлігійнага турызму года», «Падзейнае мерапрыемства года», «Аб'ект дзелавога турызму года».

Як адзначылі ў Нацыянальным агенцтве па турызме, «Пазнай Беларусь» - не толькі прэстыжны конкурс, але і важны інструмент для стымулявання канкурэнтаздольнасці рынку турыстычных паслуг. Гэта не толькі магчымасць заахвоціць за ўклад у развіццё галіны, але і прыцягнуць увагу да турыстычных брэндаў. Акрамя таго, конкурс накіраваны на папулярызацыю актыўнага адпачынку, здаровага ладу жыцця, гісторыка-культурнай і прыроднай спадчыны краіны, павышэнне прэстыжу прафесій, занятых у турыстычнай індустрыі і стымуляванне выкарыстання сучасных тэхналогій.

У 2024 годзе было пададзена 1772 заяўкі (у 2023 годзе - 835). Найбольшай папулярнасцю карысталіся намінацыі «Фатаграфія года» (484 заяўкі), «Я спазнаю Беларусь» (431 заяўка) і «Падзейнае мерапрыемства года» (146 заявак).

Цырымонія ўрачыстага ўзнагароджання пераможцаў адбудзецца ў снежні 2025 года.

Арганізатарамі конкурсу выступаюць Міністэрства спорту і турызму і Нацыянальнае агенцтва па турызме.

БЕЛТА