Сучасная паліклініка і рэканструкцыя будынка: у Чэрыкаве правядуць капрамонт бальніцы

У Чэрыкаўскай цэнтральнай раённай бальніцы сёлета плануюць правесці капітальны рамонт з рэканструкцыяй існуючых плошчаў. Пра гэта расказаў начальнік галоўнага ўпраўлення па ахове здароўя Магілёўскага аблвыканкама Аляксандр Старавойтаў.

«У гэтым годзе плануем праводзіць маштабныя працы ў Чэрыкаўскай ЦРБ. Тут запланаваны капітальны рамонт з рэканструкцыяй існуючых плошчаў. Будуць абноўлены ўсе аддзяленні, сфарміравана сучасная паліклінічная частка, - расказаў ён. - Акрамя гэтага, у раённую бальніцу будзе закуплена сучаснае медыцынскае абсталяванне, якое дазволіць зрабіць аказанне неабходнай медыцынскай дапамогі яшчэ больш якасным».

У раённай бальніцы скароціцца колькасць ложкаў – іх стане 68. «На прыкладзе Слаўгарадскай цэнтральнай раённай бальніцы мы бачым, што такая колькасць ложкаў для бальніцы з'яўляецца аптымальнай. Цяпер ідзе трансфармацыя ўсёй сістэмы аховы здароўя. Мы бачым, як мяняюцца падыходы ў аказанні дапамогі. Напрыклад, зараз аперацыі па большай частцы не палосныя, а лапараскапічныя. Акрамя гэтага, зараз на ўзбраенні лекараў ёсць сучаснае абсталяванне, якое сур'ёзна спрасціла дыягностыку і лячэнне», - распавёў Аляксандр Старавойтаў.

Як ён адзначыў, аптымізацыя таксама звязана і з тым, што ў вобласці сфарміраваны міжрэгіянальныя цэнтры: «Цяпер асноўная задача раённых бальніц - своечасова выявіць захворванне і па магчымасці аказаць дапамогу на месцы. А калі сітуацыя аказалася больш складаная - перадаць пацыента ў міжрэгіянальны цэнтр, дзе ёсць высокакваліфікаваныя спецыялісты і больш разнастайнае медабсталяванне».

На сённяшні дзень у Чэрыкаўскай цэнтральнай раённай бальніцы функцыянуюць хірургічнае, педыятрычнае, тэрапеўтычнае аддзяленні, палата рэанімацыі і інтэнсіўнай тэрапіі і міжраённае аддзяленне для цяжарных і парадзіх. У склад паліклінічнай часткі ўваходзіць педыятрычны і стаматалагічны кабінеты, жаночая кансультацыя.

БЕЛТА