Сучасныя формы і адсутнасць фармалізму. Мінадукацыі аб эфектыўнасці патрыятычнага выхавання

У сістэме адукацыі Беларусі актыўна рэалізуюцца меры па павышэнні эфектыўнасці патрыятычнага выхавання вучняў, накіраваныя на выключэнне фармалізму і ўкараненне сучасных форм і метадаў. Пра гэта расказала кансультант упраўлення сацыяльнай, выхаваўчай і ідэалагічнай работы галоўнага ўпраўлення выхаваўчай работы і маладзёжнай палітыкі Міністэрства адукацыі Наталля Шыманская.

Наталля Шыманская адзначыла, што ў сувязі са святкаваннем 80-годдзя вызвалення Беларусі ад нямецка-фашысцкіх захопнікаў і Перамогі савецкага народа ў Вялікай Айчыннай вайне быў распрацаваны план па падрыхтоўцы і правядзенні адпаведных мерапрыемстваў. Многія з іх рэалізуюцца сумесна з рознымі міністэрствамі, грамадскімі аб'яднаннямі і арганізацыямі.

Так, у 2024 годзе стартавала рэспубліканская героіка-патрыятычная акцыя «Вялікай Перамозе - 80!», якая накіравана на фарміраванне ў моладзі патрыятычных і духоўна-маральных якасцей праз прыклады баявых і працоўных подзвігаў беларускага народа.

Наталля Шыманская падкрэсліла паспяховасць культурна-адукацыйнага патрыятычнага праекта «Цягнік Памяці», які стартаваў у 2022 годзе. «Гэтая патрыятычная акцыя аб'яднала моладзь Беларусі і Расіі і стала наглядным урокам гісторыі для маладога пакалення», - адзначыла яна.

«У 2024 годзе ў акцыі ўдзельнічала 55 прадстаўнікоў Расіі, 55 - Беларусі, а таксама па 15 удзельнікаў з Арменіі, Кыргызстана, Узбекістана, Азербайджана і Таджыкістана. Агульная колькасць удзельнікаў праекта склала 205 школьнікаў і 65 суправаджаючых. Старт акцыі адбыўся 21 чэрвеня ў Брэсце», - распавяла Наталля Шыманская. Удзельнікамі акцыі сталі навучэнцы дзясятых класаў, якія дасягнулі высокіх паказчыкаў у навучальнай, грамадскай, спартыўнай, валанцёрскай і іншай дзейнасці.

Ужо традыцыйнай стала рэспубліканская выстава-конкурс дзіцячай і маладзёжнай творчасці «РRВызваленне». Па выніках правядзення конкурсаў лепшыя работы размяшчаюцца ў выставачнай зале Нацыянальнага цэнтра мастацкай творчасці дзяцей і моладзі і становяцца здабыткам грамадскасці.

Упадабаўся моладзі і Рэспубліканскі фестываль мастацкай творчасці навучэнскай і студэнцкай моладзі «АРТ-вакацыі». У 2024 годзе ён прайшоў пад дэвізам «Моладзь і час: подзвіг у імя будучыні». Тэма знайшла сваё адлюстраванне ў тэматычных канцэртных праграмах і выступах калектываў вакальна-харавога, інструментальнага, харэаграфічнага і тэатральнага жанраў.

БЕЛТА