Сустрэчы з аўтарамі і выстава літаратуры. У Магілёве праходзяць «Пысінскія чытанні»

У Магілёўскай абласной бібліятэцы ім. В.І. Леніна стартавалі 13-я «Пысінскія чытанні», тэмай якіх сёлета сталі ваенныя лёсы пісьменнікаў Магілёўшчыны.

Як расказала дырэктар абласной установы культуры Ілона Сарокіна, тэматычнае мерапрыемства будзе складацца з некалькіх блокаў. «Мы прымаем ужо 13-я па ліку «Пысінскія чытанні», якія прысвечаны памяці нашага паэта-земляка Аляксея Васільевіча Пысіна, які быў не толькі таленавітым аўтарам, але і франтавіком. Яго вершы мелі вялікую сілу. І, вядома, кожны год расказваць нашым гасцям толькі пра Аляксея Васільевіча мы не можам. Дзякуючы яго сям'і і калегам па журналісцкім цэху мы змаглі вывучыць яго жыццёвы і творчы шлях, - расказала яна. - У гэтым годзе, напярэдадні 80-годдзя вызвалення Магілёўскай вобласці ад нямецка-фашысцкіх захопнікаў, літаратурная частка нашага мерапрыемства прысвечана менавіта магілёўскім паэтам і пісьменнікам, якія прайшлі Вялікую Айчынную вайну. Шмат каго з іх мы ведаем як таленавітых аўтараў, але, на жаль, мы вельмі мала ведаем пра іх ваенную гісторыю».

Яшчэ адна асаблівасць літаратурнага мерапрыемства сёлета - са сцэны прагучаць урыўкі твораў магілёўскіх паэтаў і пісьменнікаў у выкананні моладзі. «Мы імкнемся рабіць так, каб маладое пакаленне адчула і зразумела, што такое вайна і якія жахі яна прыносіць з сабой. Прачытанне такіх твораў выклікае ў хлопцаў вельмі моцны эмацыйны водгук, а таксама разуменне таго, з якімі цяжкасцямі сутыкаліся нашы людзі, - падкрэсліла Ілона Сарокіна. - Таксама ў нас пройдзе тэматычнае мерапрыемства для дзяцей, а трэцяй часткай чытанняў стане прэзентацыя новай кнігі аднаго з магілёўскіх аўтараў».

Галоўнымі ўдзельнікамі тэматычнага мерапрыемства сталі навучэнцы сацыяльна-гуманітарнага каледжа і будучыя бібліятэкары, а таксама прадстаўнікі Магілёўскага абласнога аддзялення ГА «Саюз пісьменнікаў Беларусі».

«Гэтая тэматычная імпрэза – заўсёды важная падзея для літаратурнай Магілёўшчыны і грамадзянскай супольнасці нашай вобласці. У гэтай зале сёння сабраліся не толькі прадстаўнікі бібліятэкі, але і моладзь, прычым гэтая моладзь - будучыя настаўнікі і педагогі, а таксама нашы пісьменнікі, - адзначыў старшыня Магілёўскага абласнога аддзялення ГА «Саюз пісьменнікаў Беларусі» Аляксандр Казека. - Мы абазначылі тэму чытанняў - гэта літаратура і Вялікая Айчынная вайна, сувязь пісьменнікаў Магілёўскай вобласці з ваеннай тэматыкай. Мы сёння раскрыем яе, абазначым асноўныя кропкі гэтых падзей. Вядома, нам не атрымаецца за адзін раз закрануць усіх пісьменнікаў, якія бралі ўдзел у асвятленні гэтай тэмы. Але асноўныя з іх сёння будуць прапанаваны. І, вядома ж, мы пачнем з Аляксея Васільевіча Пысіна, закранем тэму генацыду беларускага народа ў гады Вялікай Айчыннай вайны».

Як падкрэсліў Аляксандр Казека, сучасным пісьменнікам неабходна прадаўжаць узнімаць тэму вайны. «І расказваць аб гэтым трэба не сухой статыстыкай, не лічбамі, а паказаць, у тым ліку і моладзі, што за гэтымі сухімі звесткамі і лічбамі крыюцца сапраўдныя лёсы і трагедыі людзей», - сказаў ён.

БЕЛТА