Святлана Шутава: мы павінны любіць і шанаваць сваю Радзіму і вучыць гэтаму сваіх дзяцей

Святлана Шутава, дэпутат Палаты прадстаўнікоў Нацыянальнага сходу Рэспублікі Беларусь, старшыня Магілёўскай абласной арганізацыі Беларускага саюза журналістаў:

– Пасланне Прэзідэнта да беларускага народа і Нацыянальнага сходу – гэта заўсёды грунтоўны аналіз таго, што адбывалася і адбываецца ў беларускім грамадстве, а такім чынам, тычыцца кожнага з нас. Акрамя размовы аб унутранай сітуацыі прагучалі выразныя пасылы нашых знешніх партнёраў. І яны, безумоўна, зводзіліся да таго, што кіраўнік дзяржавы чарговым разам падкрэсліў: Беларусь – суверэнная, незалежная, а галоўнае – мірная краіна, мы ні з кім не варагуем і не збіраемся ваяваць. Але ў той жа час было вельмі выразна пазначана, што на праявы варожасці ў бок нашай краіны мы будзем рэагаваць дастаткова жорстка.

Базавыя прынцыпы, усё, аб чым ішла гаворка, зводзілася да кансалідацыі грамадства.

«Год народнага адзінства паказаў усяму свету згуртаванасць і ўстойлівасць беларусаў. Што мы можам жыць сваім розумам, шанаваць нашы каштоўнасці і разам ствараць новыя. Мы вытрымалі шэраг сур’ёзных выпрабаванняў, перш за ўсё звязаных з каранавірусам, санкцыямі, хвалямі міграцыйнага крызісу. Ужо зараз зразумела: мы справіліся толькі дзякуючы адзінству, – адзначыў Аляксандр Лукашэнка. – Трэба не толькі захаваць краіну ў жорнах новага перадзелу свету, але і пабудаваць нашу будучыню. І трэба працаваць на апярэджанне. І, можа, тое, што сёння здаецца камусьці дзіўным, заўтра стане запозненым».

Прэзідэнт справядліва падкрэсліў, што паўсюдна крытычна павышаецца ўзровень агрэсіі, рыторыка выкліку стала нормай, а міратворчыя ініцыятывы кладуцца пад сукно.

Сусветнае грамадскае меркаванне рыхтуюць да непазбежнасці вайны. Людзей прымушаюць жыць з такой думкай. Па сутнасці, вырашаецца лёс чалавецтва, а значыць, і нас з вамі.

«Мір – гэта абсалютная каштоўнасць для беларусаў. Крыніца беларускіх каштоўнасцей – гістарычная памяць. Нашы каштоўнасці і ідэалы былі і застануцца непарушнымі», – сказаў кіраўнік дзяржавы. Гэтыя словы заўсёды знаходзяць водгук у кожнай беларускай сям’і, у кожнай з якой ёсць свая трагічная гісторыя, звязаная з Вялікай Айчыннай вайной. Мне гэта блізка яшчэ і таму, што мая акруга (Асіповіцкі № 89 – аўт.) – партызанская зона, дзе кожны куток зямлі да гэтага часу «памятае» жахі вайны.

Упэўненая, кожнаму была блізкая і тэма каранавіруса. І гэта яшчэ адзін спосаб ціску на нашу краіну, за яе асаблівы, але, як паказаў час, верны шлях у пераадоленні пандэміі.

«Мы навучыліся жыць з пандэміяй без надзвычайных крокаў. З першых дзён мы змаглі адаптавацца да новых умоў і ў максімальна сціслыя тэрміны знайсці інавацыйныя рашэнні гэтай праблемы без істэрык і мітусні», – адзначыў беларускі лідар.

Дакладна і тое, што «лёгкага хлеба» не бывае. Гэта тычыцца часткі беларускай моладзі, якая хоча жыць камфортна, багата, але прыкладаць да гэтага мінімум намаганняў, па большай частцы, седзячы за гаджэтамі, марачы быць блогерамі, чыя «праца» здаецца ім найбольш прымальнай. Але ж, пагадзіцеся, за камп’ютарам хлеб не вырасціць, дзяцей не выхаваць і годнае жыццё бацькам не забяспечыць. Дадзеную тэму (прывучаць дзяцей працаваць – аўт.) практычна заўсёды імкнуся закрануць, бываючы ў акрузе на сустрэчах з выбаршчыкамі. Гэта, на мой погляд, таксама адзін з асноўных і па-чалавечы верных пасылаў размовы. Мы павінны любіць і шанаваць сваю Радзіму і вучыць гэтаму сваіх дзяцей.

mogilevnews.by