Таццяна Ларына ўзначаліла абласное аддзяленне саюза журналістаў

Магілёўскае аддзяленне ГА «Беларускі саюз журналістаў» узначаліла дырэктар тэлерадыёкампаніі «Магілёў» Таццяна Ларына. Яе кандыдатура была аднагалосна падтрымана на справаздачна-выбарнай канферэнцыі абласнога аддзялення ГА «БСЖ».

У працы канферэнцыі прынялі ўдзел першы намеснік міністра інфармацыі Рэспублікі Беларусь Андрэй Кунцэвіч, старшыня Праўлення ГА «Беларускі саюз журналістаў», генеральны дырэктар УП «Агенцтва «Мінск-Навіны» Андрэй Крывашэеў, першы намеснік старшыні Праўлення ГА «Беларускі саюз журналістаў» Алена Радоўская, кіраўнікі і журналісты СМІ рэгіёна.

Новаабраны лідэр падзякавала за аказаны давер, адзначыўшы, што, нягледзячы на тое, што доўгі час працуе тэлевізійным журналістам, добра знаёмая са спецыфікай працы і журналістаў друкаваных СМІ.

«З 2008 па 2010 гады я працавала ў «Сельскай газеце», таму будні рэдакцый газет мне вядомыя, я ведаю, якая гэта няпростая праца, - сказала Таццяна Аляксандраўна. - Ну а сучасныя рэаліі зрабілі гэтую працу яшчэ больш адказнай і значнай.

Сённяшнія журналісты значна адрозніваюцца ад тых, што былі яшчэ некалькі год таму. Мы вельмі згуртаваліся, і газетчыкі, і тэлевізіёншчыкі стаяць зараз плячом да пляча для таго, каб расказваць усім праўду, для таго каб наша дзяржава рабілася мацнейшай, мацнейшай. І мы будзем рабіць сваю працу сумленна, рабіць яе добра, расказваць гледачам, чытачам праўду і толькі праўду для таго, каб умацоўваць сваю дзяржаву».

Таксама ў рамках канферэнцыі прайшло ўзнагароджанне найлепшых прадстаўнікоў СМІ і работнікаў паліграфіі.

mogilevnews.by, фота Галіны Гаўрыловіч