Цыкл мерапрыемстваў да Дня моладзі і студэнцтва запусцілі ў МДУ імя А. А. Куляшова ў Магілёве. Пра гэта расказала начальнік аддзела па выхаваўчай рабоце з моладдзю ўніверсітэта Кацярына Сапетава.
На працягу гэтага тыдня МДУ імя А. А. Куляшова і ПА/РК ГА «БРСМ» арганізавалі цыкл мерапрыемстваў, прымеркаваных да Тыдня моладзі і студэнцтва «MOLADZ: памятаем традыцыі, жывём сучасным, імкнёмся ў будучыню».
Сёння ва ўніверсітэце пройдзе тэматычная сустрэча, прысвечаная моладзі і навуцы. Перад студэнтамі выступіць пераможца рэспубліканскага маладзёжнага праекта «100 ідэй для Беларусі» Уладзіслаў Малаткоў. Ён атрымаў перамогу з праектам «Энергаэфектыўная спецвопратка» ў намінацыі «Энергетыка, у тым ліку атамная энергетыка і энергаэфектыўнасць».
Галоўная ідэя праекта заключаецца ў стварэнні больш таннага, у параўнанні з замежнымі аналагамі, практычнага, зручнага і лёгкага энергаэфектыўнага касцюма, які не патрабуе падзарадкі ад USB. Уся дадатковая абагравальная канструкцыя ў яго распрацоўцы з’яўляецца здымнай, што дазваляе выкарыстанне яе ў розных галінах прамысловасці і народнай гаспадаркі. Камплект адзення з абуткам можна выкарыстоўваць пры працяглым знаходжанні на вуліцы з нізкімі тэмпературнымі паказчыкамі.
Яшчэ адным спікерам стане кандыдат гістарычных навук, дацэнт, член Савета маладых навукоўцаў пры МДУ Аляксей Аўласовіч. Ён раскажа аб навуковай рабоце, якая праводзіцца ва ўніверсітэце, падзеліцца з удзельнікамі сустрэчы сваім асабістым вопытам у навуковай дзейнасці.
Пры выкарыстанні матэрыялаў актыўная гіперспасылка на mogilev-region.gov.by абавязковая
