Тэматыку адзінага дня інфармавання абмеркавалі ў Магілёўскім аблвыканкаме

Інструктыўна-метадычная нарада напярэдадні адзінага дня інфармавання, якая пройдзе 18 студзеня, адбылася ў Магілёўскім аблвыканкаме. Удзел у ім прынялі памочнік Прэзідэнта - інспектар па Магілёўскай вобласці Леанід Мартынюк, начальнік галоўнага ўпраўлення ідэалагічнай работы і па справах моладзі аблвыканкама Кацярына Музычэнка. У фармаце відэаканферэнцсувязі з раённых і ў абласной студыі да мерапрыемства далучыліся члены інфармацыйна-прапагандысцкіх груп, прарэктары вышэйшых навучальных устаноў, лідэры меркаванняў маладзёжнага асяроддзя - студэнты ВНУ рэгіёну.

У сваім прывітальным слове да ўдзельнікаў Кацярына Музычэнка адзначыла, што не выпадкова першы сёлета АДІ прысвечаны тэме «Год якасці – залог поспеху сацыяльна-эканамічнага развіцця краіны».

«Якасць – гэта не толькі пра прадукцыю або паслугі. Гэта і пра якасць працы, здароўя, адносіны ў сям'і ці ў працоўным калектыве. Гэта пра актыўную грамадзянскую пазіцыю, пра ўдзел у жыцці грамадства і дзяржавы. Пра заняткі спортам і самаадукацыю. У гэтым годзе шмат будзе залежаць ад намаганняў кожнага з нас. Таму з першых жа дзён наладжваемся на працу і закасваем рукавы, – падкрэсліла яна. – Якасная праца немагчымая без якаснага планавання і якаснага аналізу зробленага. Менавіта гэтыя пасылы сталі асновай праведзенай сустрэчы старшыні абласнога выканаўчага камітэта Анатоля Міхайлавіча Ісачанкі з актывам Магілёўскай вобласці. І на гэта трэба абапірацца ў выбудоўванні сваёй дзейнасці».

Таксама галоўны ідэолаг вобласці пазначыла, што ў тэматыку адзінага дня інфармавання ўключаны пытанні, звязаныя з прафілактыкай злачынстваў супраць палавой недатыкальнасці непаўналетніх, новаўвядзенні ў працоўным заканадаўстве нашай краіны і прафілактычная інфармацыя ад МНС.

Удзельнікам сустрэчы і асноўным дакладчыкам у гэты дзень выступіў старшыня Каардынацыйнай Рады грамадскіх арганізацый і палітычных партый Магілёўскай вобласці Андрэй Нікіцін: «Тэма якасці трактуецца ў шырокім разуменні і выкладанні. Таму заўсёды даступней для разумення, калі спікерамі для выступаў выкарыстоўваецца мясцовы матэрыял - прыклады, блізкія і зразумелыя людзям.

А тое, што мы сёння загаварылі аб якасці, на мой погляд, указвае на тое, што базавыя патрэбы насельніцтва задаволены, у нас ёсць усё, каб нармальна жыць і развівацца. Але ў той жа час размова ідзе аб тым, што мы павінны ўбачыць для сябе новы ўзровень. Пацвярджэнне гэтаму мы не раз чулі ў выступах кіраўніка дзяржавы, а таксама ў нядаўнім звароце да актыву Магілёўшчыны старшыні аблвыканкама».

На заканчэнне сустрэчы Леанід Мартынюк падкрэсліў, што не павінна быць фармальнага падыходу да правядзення такіх інфадней: «Інфармацыя павінна быць зразумелай і цікавай для аўдыторыі. Для гэтага трэба дэталёва ўглыбіцца ў тэмы, разабрацца, каб даступна данесці іх людзям, не ператвараючы ў лекцыю. Калі неабходна –  прыцягнуць профільных спецыялістаў. І калі з аўдыторыі пасля выступлення паступае шмат пытанняў – гэта добра. Значыць, тэма закранута патрэбная, значная. І, як правільна было сказана, трэба на канкрэтных прыкладах паказваць, як гэта працуе ў жыцці. Ні ў якім разе, паўтаруся, не дапушчаючы фармальных падыходаў. Людзі гэта адчуваюць», - рэзюмаваў памочнік Прэзідэнта.

Юлія Таранава, фота Галіны Гаўрыловіч