Тонкая настройка на знешнім контуры. Падрабязнасці нарады Аляксандра Лукашэнкі з дыпламатамі

Неабходна правесці тонкую настройку работы на знешнім контуры. Аб гэтым Прэзідэнт Беларусі Аляксандр Лукашэнка заявіў на нарадзе з кіраўнікамі беларускіх дыпламатычных прадстаўніцтваў.

«Стратэгія, якой бы дакладнай і гістарычна выверанай яна ні была, патрабуе пастаяннай карэкціроўкі на тактычным узроўні. Менавіта здольнасць своечасова адаптаваць свае дзеянні ў рамках агульнай мэты робіць уладу жыццяздольнай і дыпламатычна эфектыўнай. Вось аб гэтай тонкай настройцы нашай работы на знешнім контуры прымяняльна да канкрэтных рэгіёнаў і скразных тэм мы і пагаворым», - сказаў кіраўнік дзяржавы.

Паводле яго слоў, у цэлым для Беларусі, як і раней, краевугольным каменем застаецца эканоміка. «Гэта фундамент. Будзе эканоміка дынамічна развівацца - будзем жыць добра і вырашаць усе пытанні - сацыяльныя, культурныя, абаронныя», - падкрэсліў Прэзідэнт.

Ён адзначыў, што Беларусь - гэта сярэдняя па еўрапейскіх мерках краіна з адкрытай эканомікай, арыентаванай на экспарт. Таму нарошчванне і эфектыўнасць знешняга гандлю - безумоўныя прыярытэты, без чаго ніяк не выжыць.

«Гэту нашу слабаабароненасць спрабуюць выкарыстоўваць супраць нас і эканамічныя канкурэнты, і палітычныя апаненты, збеглыя. Еўрасаюз з 2020 года наштампаваў ажно 18 пакетаў санкцый. Праўда, чым далей, тым марудней. У 2022 годзе прыняў пяць, потым чатыры, потым тры. У бягучым годзе пакуль адзін пакет. Няма чаго больш забараняць? Або адчулі, што страляюць сабе ў нагу? Напэўна, і тое і другое», - звярнуў увагу кіраўнік дзяржавы.

Прэзідэнт упэўнены, што поспех у дасягненні мэт залежыць непасрэдна ад зладжанага выканання пастаўленых задач і бездакорнай дысцыпліны. "Вы людзі больш чым ваенныя. Помніце: без гатоўнасці адстойваць нацыянальныя інтарэсы Беларусі нічога не будзе, - звярнуўся ён да ўдзельнікаў нарады. - Або будзе, але ўжо без вас, чаго не хацелася б. Мне вельмі не хацелася б. Я часта гавару: вы мае дзеці. 2020 год у сістэме МЗС мы больш не паўторым".

Кіраўнік дзяржавы падкрэсліў, што кожны кіраўнік дыпламатычнага прадстаўніцтва галавой адказвае за свой рэгіён і краіну акрэдытацыі. «Вам пра гэта гаварылася пры назначэнні, і кожнаму дадзены канкрэтныя даручэнні. Зыходжу з таго, што пры агульным прыярытэце эканомікі задачы паслам ставяцца персанальныя. У сувязі з гэтым і да ацэнкі эфектыўнасці іх вырашэння таксама варта падыходзіць строга індывідуальна», - сказаў Аляксандр Лукашэнка.

На заканчэнне Прэзідэнт адзначыў, што разлічвае на агульную зладжаную работу МЗС і ўсіх зацікаўленых ведамстваў: «Паўтаруся: час ваенны, а дыпламаты - таксама, па сутнасці, людзі ваенныя».

БЕЛТА