Трактарны біятлон прайшоў у БДСГА

22.02.202317:16

Адкрытае першынство «Трактарны біятлон 2023» адбылося сёння ў Беларускай дзяржаўнай сельскагаспадарчай акадэміі ў Горках. Незвычайны біятлон на трактарах замест лыж праходзіць ужо другі раз. Спаборніцтвы прымеркавалі да Дня абаронцаў Айчыны і Узброеных Сіл Рэспублікі Беларусь.

Да ўдзелу ў трактарным біятлоне запрасілі не толькі студэнтаў сельгасакадэміі, але і ўсіх ахвочых, якія маюць пасведчанне трактарыста-машыніста. Усяго сабралася 27 удзельнікаў. Сярод іх сямейная каманда Лагуновых. Сын - майстар вытворчага навучання БДСГА Максім Лагуноў, а яго бацька Міхаіл Лагуноў - трактарыст з 20-гадовым стажам:

- Мяне запрасілі, мы з задавальненнем прыехалі ўсёй сям'ёй з жонкай, ятроўкай у якасці групы падтрымкі. Я зараз працую на цэментным заводзе ў Касцюковічах, але на ўсіх відах сельгастэхнікі адпрацаваў больш за 20 гадоў у сельскай гаспадарцы. Чаму б не паспаборнічаць з моладдзю! Пакуль чакаю сваёй чаргі, трасу мне паказалі - я яшчэ і не такое ўмею. Але хлопцы спраўляюцца вельмі класна, таму іх тут вучаць добра.

Дарэчы, сын Міхаіла Васільевіча - інструктар па навучанні ваджэнню студэнтаў у БДСГА. Максім сам выпускнік сельгасакадэміі, у спаборніцтвах выступае апошнім, бо ён яшчэ і суддзя:

- У якасці трасы задзейнічалі навучальны трактародрам - поле, дзе студэнты адпрацоўваюць навыкі палявых работ. Я асабіста рыхтаваў трасу і магу сказаць, што сёлета з-за моцнага марозу яна больш падступная: зямля прамерзла, слізка. Траса стала і складаней па элементах: з'явілася вялікая «змейка», «васьмёрка». У якасці дадатковых конкурсаў - імправізаванае прасоўванне ніткі ў іголку і апусканне грузу ў мішэнь, і ўсё гэта робіцца з дапамогай трактара. Штрафныя кругі - за промахі пры стральбе з пнеўматыкі, а за з'езд з трасы або збіванне слупкоў - штрафныя ачкі. Насамрэч, сакрэт у правіле «Цішэй едзеш - далей будзеш». Як паказвае практыка, перамагае той, хто дакладна ехаў, трапна страляў. Але многія прыходзяць сюды па адрэналін, таму едуць на ўсіх хуткасцях.

Калі ў мінулы раз сярод удзельнікаў была адна прадстаўніца прыгожага полу, то на гэты раз іх ужо дзве. Алена Шалыпіна - магістрант, выпускніца мехфака, збіраецца выкладаць у акадэміі. На спаборніцтвы дзяўчына прыйшла не толькі з яркім макіяжам, а яшчэ і з жаданнем ярка выступіць:

- Планую праехаць па лужыне на ўсіх парах, каб пырскі ляцелі ў розныя бакі і атрымаліся класныя фоткі! Правы мы атрымалі яшчэ на 3 курсе. І каб не забываць, як гэта трактарам кіраваць, спаборніцтвы не прапускаю. Ужо хутка ў сакавіку ў акадэміі пройдзе ўніверсіяда, я буду выступаць за сваю ВНУ па армрэстлінгу.

Яшчэ адна дзяўчына на трактарным біятлоне - першакурсніца агратэхналагічнага факультэта Анастасія Коршук. Права дзяўчына атрымала падчас навучання ў аграрным каледжы:

- Я хоць і навучаюся на агародніка, вельмі хацелася пракаціцца на трактары! На перамогу не разлічваю, страляла па мішэнях я ўвогуле ўпершыню. Але атрымала столькі эмоцый, што нават прамільгнула думка перайсці на мехфак.

Цікавімся пра складаныя моманты трасы ў аднаго з тых, хто прыйшоў на фініш. Раман Цікар вучыцца на 4 курсе мехфака:

- У мінулым годзе я быў у якасці гледача, захацелася паспрабаваць самому. Накшталт вынік добры: час праходжання трасы - 5 хвілін 42 секунды, выбіў 4 з 5. Я ўжо сёлета размяркоўваюся ў гаспадарку, буду інжынерам. І для кіраўніка, я лічу, важна паказаць падначаленым, што ты сам выдатна спраўляешся з іх працай, здольны падказаць, а калі трэба - замяніць. Гэта аўтарытэт.

Дэкана факультэта механізацыі сельскай гаспадаркі Уладзіміра Гусарава сустракаем ва ўборы кухара. Аказваецца, ён варыць юшку для ўдзельнікаў і гасцей трактарнага біятлона:

- Юшка будзе з двух відаў рыбы: белай і чырвонай. Яшчэ ў нас чай, каша - на марозе гарачы пачастунак разыходзіцца на ўра. Мы вырашылі ператварыць спаборніцтвы ў сапраўднае свята для ўсіх. У гэтым годзе ўдзельнічаюць не толькі студэнты мехфака, але і яшчэ трох факультэтаў. Па-за конкурсам трасу прайшоў нават старшыня Горацкага райвыканкама Міхаіл Гулы: мог бы і ў лідэры выйсці, выбіў 5 з 5 і прадэманстраваў класнае кіраванне. Спонсарам уступіў Горацкі элеватар. Пераможца атрымае прэмію ў 5 базавых велічыняў, 4 базавыя - другое месца, 3 базавыя за «бронзу». Свае прызы падалі таксама ПВУП «ВасЛес», БРСМ, Белая Русь. З цягам часу наш трактарны біятлон можа стаць брэндам, збіраць яшчэ больш удзельнікаў і гасцей.

Такім чынам, першае месца заняў студэнт 3 курса Павел Сліжоў, «серабро» дасталася Максіму Славнікаву, а 3 месца заваяваў Яўген Зянькоў.

СБ

Форма пошуку

Вы тут

Чытайце таксама ў катэгорыі "рэгіёны":