ТРК «Магілёў» адзначана двума дыпломамі творчага конкурсу Мінабароны Беларусі

Тэлерадыёкампанія« Магілёў» адзначана двума дыпломамі творчага конкурсу Мінабароны Беларусі. Напярэдадні ў Мінску ўзнагародзілі пераможцаў штогадовага творчага конкурсу на найлепшае асвятленне ў СМІ пытанняў будаўніцтва і развіцця Узброеных Сіл Беларусі, патрыятычнага выхавання насельніцтва.

Цыкл радыёрэпартажаў і радыёперадач «Радыё Магілёў» удастоены дыплома першай ступені ў намінацыі «Аўтарскі погляд» – за цыкл радыёпраграм аб жыцці і дзейнасці органаў ваеннага кіравання, злучэнняў і воінскіх часцей Узброеных Сіл, ваенных навучальных устаноў і арганізацый Міністэрства абароны. Для «Радыё Магілёў» гэта ўжо не першая перамога ў творчым конкурсе Мінабароны і Мінінфарма.

Дыплом другой ступені ў намінацыі «Спецыяльны праект» (за спецыяльную рубрыку, якая адлюстроўвае жыццё і дзейнасць органаў ваеннага кіравання, злучэнняў і воінскіх часцей Узброеных Сіл, ваенных навучальных устаноў і арганізацый Міністэрства абароны) заваявала тэлепраграма «Адкуль я ведаю» тэлеканала «Беларусь 4. Магілёў». Журы адзначыла творчы падыход аўтара праграмы Алены Громавай і яе юных сувядучых, якія ў праекце «Адкуль я ведаю: армія» расказалі, навошта патрэбны вайскоўцы ў мірны час, хто валодае ваеннай таямніцай і што такое гонар мундзіра.

У гэтым годзе на конкурс было прадстаўлена 128 заявак ад сродкаў масавай інфармацыі Беларусі. Вынікі традыцыйна падводзілі ў чатырох асноўных групах: «Друкаваныя СМІ», «Тэлебачанне», «Радыё», «Інфармацыйныя агенцтвы». Пераможцы вызначаны ў 17 намінацыях, якія ахопліваюць увесь спектр інфармацыйнай дзейнасці ў рэспубліцы, усе жанры, формы і спосабы асвятлення ваенна-патрыятычнай тэматыкі.

У цырымоніі ўзнагароджання прынялі ўдзел памочнік міністра абароны па ідэалагічнай рабоце ва Узброеных Сілах – начальнік галоўнага ўпраўлення ідэалагічнай працы Міністэрства абароны палкоўнік Леанід Касінскі і першы намеснік міністра інфармацыі Павел Лёгкі.

ТРК «Могилев»